Azərbaycan Premyer Liqasında mübarizə aparan “Zirə”nin futbolçusu Ange Mutsinzi Ruanda yığmasında növbəti matçına çıxıb.
Arena.az xəbər verir ki, o, Afrika Millətlər Kubokunun qrup mərhələsinin sonuncu turu çərçivəsində Nigeriyaya qarşı oyunda iştirak edib.
Səfərdə baş tutan qarşılaşma Ruandanın 2:1 hesablı qələbəsi ilə yekunlaşıb.
Start heyətində yer alan Mutsinzi 90 dəqiqə meydanda olub. Komandasının ilk qolunu da 26 yaşlı müdafiəçi vurub. O, 72-ci dəqiqədə bərabərlik qoluna imza atıb, bundan 3 dəqiqə sonra isə komandası qələbəni təmin edib.
Ruanda yığması 6 oyuna topladığı 8 xalla yer aldığı D qrupunda 3-cü olub. Nigeriya yığması 11 xalla qrup qalibi olubsa, 8 xal toplamış Benin ikinci yerlə növbəti mərhələyə adlayıb. Liviya isə 5 xalla sonuncu olub.
Xatırladaq ki, Ange Mutsinzi “Zirə”yə bu yay Norveçin “Jerv” klubundan cəlb olunub. Mərkəz müdafiəçisi ilə 3 illik müqavilə imzalanıb. O, Azərbaycan klubunun heyətində 16 oyun keçirib.
Mutsinzi 2019-cu ilin sentyabr ayında debüt etdiyi Ruanda yığmasının heyətində 27 oyuna çıxıb, 1 qol və 1 məhsuldar ötürmə ilə yadda qalıb.
