“Barselona”nın keçmiş mərkəz müdafiəçisi Jerar Pike keçmiş komanda yoldaşı, argentinalı hücumçu Lionel Messi haqqında danışıb.
Arena.az xəbər verir ki, ispaniyalı veteran vaxtilə Kataloniya klubunda çiyin-çiyinə çıxış etdiyi ulduz futbolçu barədə bunları söyləyib:
“Messi həmişə başqalarından fərqlənib. Kristiano Ronaldo insanların ən yaxşısıdır, amma “Leo” yadplanetlidir. O, bu planetə aid deyil”, deyə Jerar Pike argentinalı ulduzun oyununa valeh olduğunu başa düşməyə əsas verib.
Xatırladaq ki, Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Argentinalı ulduz cari mövsümdə “İnter Mayami”nin heyətində bütün yarışlarda 25 oyuna çıxıb, 23 qol vurub və 13 məhsuldar ötürmə verib. Təcrübəli ulduzun “İnter Mayami” karyerası ümumilikdə 39 oyun, 34 qol və 18 məhsuldar ötürmədən ibarətdir.
“Barselona”nın yetirməsi olan Lionel Messi 2021-ci ilin yayına kimi məhz Kataloniya klubunun formasını geyinib. O, bu komandanın heyətində 778 oyuna çıxıb, 672 qol vurub, 303 məhsuldar ötürmə verib. “Leo” “Barsa”nın heyətində çoxlu titullar qazanıb, tarixi rekordlara imza atıb.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 190 oyun keçirib, 112 qol vurub və 60 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
