Bazar ertəsi günü beynəlxalq birjalarda dollar major valyutalar qarşısında ucuzlaşdı. Belə ki, EUR/USD valyuta cütlüyü 1.0516 səviyyəsindən 1.0606 səviyyəsinə qədər artım göstərdi. GBPUSD cütlüyü eyni dövr ərzində 1.2604 həddindən 1.2686 həddinə qədər bahalaşdı. USD/JPY cütlüyü isə dünən 155.330 səviyyəsinə qədər bahalaşsa da, bugün artıq 153.950 səviyyəsinə qədər ucuzlaşıb.
Qızılın qiyməti ötən həftənin sonu başladığı artım tendensiyasını qoruyur. Dəyərli metal artıq 2620$ səviyyəsinin üzərində ticarət olunur. Neft qiymətləri 2.5%-dən çox bahalaşıb. Buna səbəb kimi ekspertlər ABŞ prezidenti Co Baydenin Ukrayna hərbçilərinin Rusiya ərazisinə zərbələr endirmək üçün “ATACMS” raketlərindən istifadə etməsinə icazə verdiyinə dair məlumatı qəbul edirlər. “Brent” markalı neftin bir barrel üzrə qiyməti 73.5$ səviyyəsinə qədər bahalaşıb.
Xüsusilə Federal Ehtiyatlar Sisteminin sədri Cerom Pavelin açıqlamalarından sonra faiz dərəcəsi ilə bağlı narahatlıqlar investorlara təsir göstərməyə davam edir. Ötən həftə o, FED-in güclü iqtisadi artım və dayanıqlı əmək bazarı göstəriciləri fonunda faiz dərəcəsini azaltmağa "tələsmədiyini" söylədi. Hal-hazırda əksər investorlar FED-in dekabr iclasında uçot dərəcəsini 25 baza bəndi endirəcəyini proqnozlaşdırır.
ABŞ-ın yeni seçilmiş prezidenti Donald Tramp administrasiyasının sürücüsüz avtomobillərlə bağlı qaydaları yüngülləşdirə biləcəyi ilə bağlı mediada yayılan xəbərlər nəticəsində “Tesla”-nın səhmlərinin qiyməti 5.6% artıb. Oktyabr ayında “Tesla”-nın baş direktoru İlon Mask bildirib ki, şirkət 2026-cı ildə sürücü idarəetməsi olmayan “Cybercab” robotaksinin kütləvi istehsalına başlamağı planlaşdırır.
Bugün Bakı vaxtı ilə saat 14:00-da ABŞ-da inflyasiyaya dair məlumatlar açıqlanacaq. Analitiklərin proqnozlarına əsasən, oktyabr ayında göstərici aylıq ifadədə 0.3%, illik ifadədə isə 2% artıb. Həmçinin ölkənin tikinti sektoruna dair açıqlanacaq məlumatlar investorların diqqət mərkəzində olacaq digər xəbərlərdəndir.
Məlumat "İnvest-AZ İnvestisiya Şirkəti"nin analitikləri tərəfindən hazırlanıb.
