Bakının "Baku Harmoniya" iqlim təşəbbüsü fermerlər üçün iqlim və kənd təsərrüfatı layihələrinin mürəkkəb mənzərəsinə aydınlıq və əlaqəlilik gətirən yenilikçi bir həlldir.
Fins.az xəbər verir ki, bu barədə Azərbaycanın kənd təsərrüfatı nazirinin müavini İlhamə Qədimova, COP29 çərçivəsində keçirilən "Fermerlər üçün Baku Harmoniya iqlim təşəbbüsünün təqdimatı: İqlim dəyişikliyinə qarşı dayanıqlığın artırılması üçün fermerlərin imkanlarının genişləndirilməsi" mövzusunda tədbirdə çıxışı zamanı bildirib.
“Sürətlə dəyişən iqlim şəraiti və qlobal ərzaq təhlükəsizliyindəki qeyri-sabitlik qarşımızda mühüm çağırışlar qoyur. Təsəvvür edin ki, siz bir fermersiniz və qeyri-müntəzəm yağıntılar, yüksələn temperatur və su çatışmazlığı kimi problemlərlə üzləşirsiniz. Siz bilirsiniz ki, texnologiyalar, maliyyə dəstəyi və tərəfdaşlıqlar mövcuddur. Lakin bu həll yollarını müxtəlif təşəbbüslər arasında tapmaq, adeta samanlıqda iynə axtarmağa bənzəyir. Məhz bu boşluğu aradan qaldırmaq üçün ‘Baku Harmoniya’ təşəbbüsü yaradılıb," – deyə Qədimova bildirib.
"Baku Harmoniya" – Fermerlər üçün Koordinasiya və İnnovasiya Platforması
Nazir müavini vurğulayıb ki, bu təşəbbüs sadəcə daha bir layihə deyil, iqlim və kənd təsərrüfatı sahəsində qlobal səyləri əlaqələndirmək üçün mühüm bir platformadır. Dünyada 90-dan çox oxşar qlobal təşəbbüs mövcud olsa da, əsas problem tədbirlərin olmamasında deyil, onların kifayət qədər koordinasiya edilməməsindədir.
“Baku Harmoniya, bu prosesin ‘dirijoru’ rolunda çıxış edərək, fərqli səyləri əlaqələndirir və maksimum təsir üçün bir araya gətirir. Bu təşəbbüs, fermerlərə real dəstək olmaqla yanaşı, qlobal iqlim tədbirlərində Azərbaycanın lider mövqeyini bir daha təsdiqləyir,” – deyə o qeyd edib.
"Baku Harmoniya" təşəbbüsü, qlobal çağırışlara cavab verən və yerli icmaları gücləndirən inteqrasiya edilmiş bir yanaşma olaraq diqqət mərkəzindədir.
Fuad Mədətov
Fins.az
