PSJ-nin və Fransa yığmasının sağ cinah hücumçusu Usman Dembele qəribə etirafı ilə ictimaiyyətin diqqət mərkəzinə düşüb.
Arena.az məlumat verir ki, Dembele “The Bridge” podkastının efirində etiraf edib ki, İkinci Dünya Müharibəsi illəri dövrünün diktatorları haqqında sənədli filmlərə baxmağı xoşlayır:
“Mən sənədli filmləri çox xoşlayıram. Mən onlara “Arte” kanalında və “YouTube”da baxıram. Keçmişdən, İkinci Dünya Müharibəsi zamanı baş vermiş hadisələrdən bəhs edən sənədli filmlərə baxıram. Mən diktatorların nə etdiyini öyrənməyi xoşlayıram. Mobutu, Stalin haqqında… Ciddidən, onlardan xoşum gəlir”, deyə Dembele bildirib.
“Sən həmişə bununla maraqlanmısan? Niyə məhz diktatorlar?” suallarını isə Dembele belə cavablayıb:
“Bəli, həmişə. Mən bilmirəm. Bilmirəm niyə”, deyə Mbappe etiraf edib.
Usman Dembele PSJ-yə 2023-cü ilin yay transfer pəncərəsində 50,4 milyon avro məbləğ müqabilində “Barselona”dan keçib. Fransalı cinah hücumçusunun Paris klubu ilə müqaviləsi 2028-ci ilin iyun ayının sonuna qədər qüvvədədir.
Cari mövsümdə Dembele PSJ-nin heyətində bütün yarışlarda 13 oyuna çıxıb, 5 qol vurub, 7 məhsuldar ötürmə verib.
Dembelenin Fransa nəhəngi üçün xidməti ümumilikdə 55 oyun, 11 qol və 21 məhsuldar ötürmədən ibarətdir.
Dembele PSJ-dən öncə “Barselona”, “Borussiya” (Dortmund) və “Renn”in uğurları üçün çalışıb.
Usman Dembele 2016-cı ilin sentyabr ayında debüt etdiyi Fransa yığmasının heyətində 53 oyun keçirib, 6 qol vurub, 4 məhsuldar ötürmə verib. Usman “xoruzlar”la Rusiyada keçirilmiş DÇ-2018-in qalibi olub.
“Transfermarkt” internet-portalı 27 yaşlı fransalı sağ cinah hücumçusu Usman Dembelenin transfer dəyərini 60 milyon avro məbləğində qiymətləndirir.
