COP29 çərçivəsində “Dayanıqlı və Rəqəmsal Orta Dəhliz və onun hüdudlarından kənarda” adlı dəyirmi masa keçirilib.
APA xəbər veriri ki, dəyirmi masa COP29 Sədrliyi, Azərbaycan Respublikasının Rəqəmsal İnkişaf və Nəqliyyat Nazirliyinin UNECE və UNESCAP ilə birgə əməkdaşlığı çərçivəsində baş tutub.
Rəqəmsal inkişaf və nəqliyyat naziri Rəşad Nəbiyev bildirib ki, bu yüksək səviyyəli dəyirmi masada nəqliyyat dəhlizlərinin rəqəmsallaşdırılması qlobal tranzit şəbəkələrinin gücləndirilməsi, karbon emissiyalarının azaldılması, əməliyyat səmərəliliyinin artırılması və çoxsaylı nəqliyyat modelləri və regionlar üzrə təchizat zəncirlərində dayanıqlığın yaradılması yolu ilə davamlı inkişaf məqsədlərinə dəstək verilməsinin ön sıralarında dayanır: “Orta Dəhliz artıq rəqəmsallaşmanın irəliləyişlərini təşviq edən və transsərhəd prosedurları asanlaşdıran, həm davamlılığı, həm də ətraf mühitin mühafizəsini birbaşa gücləndirən təşəbbüsləri irəli sürür”.
Bildirilib ki, son iki onillikdə ölkəmizdən keçən beynəlxalq dəhlizlər boyu nəqliyyat infrastrukturunun təkmilləşdirilməsinə əsaslı islahatlar və investisiyalar yönəldilib.
Qeyd edilib ki, son geosiyasi dəyişikliklərdən əvvəl Azərbaycan artıq Orta Dəhlizin strateji potensialını tanımış və mühüm infrastruktura, o cümlədən 5 milyon ton tutumlu Bakı-Tbilisi-Qars dəmir yoluna və Bakı Beynəlxalq Dəniz Ticarətinə fəal şəkildə sərmayə qoyub: “Sərhəd prosedurlarının sadələşdirilməsi və dəhlizin rəqəmsallaşdırılması istiqamətində əlavə səylər davam etdirilir. Bu gün Orta Dəhliz artıq ehtiyat planı deyil, mövcud qlobal tranzit variantlarını tamamlayan etibarlı və səmərəli yola çevrilib”.
R.Nəbiyev vurğulayıb ki, Azərbaycan 2024-cü ilin əvvəlindən Çindən Orta Dəhliz vasitəsilə bloklu qatarların hərəkətini asanlaşdırıb. Nazir bildirib ki, bu ilin sonuna kimi Azərbaycan ərazisindən 300-dən çox blok qatarın keçəcəyi gözlənilir.
