Kamera əsaslı axtarış sistemi olan "Google Lens", ABŞ-dakı istifadəçilərin alış-veriş təcrübəsini yeni səviyyəyə yüksəltməyi hədəfləyir. Bu sistem vasitəsilə kameraya göstərilən məhsullar avtomatik olaraq tanınır və onların internetdəki qiymətləri, detallı məlumatları və istifadəçi rəyləri təqdim edilir. "Lens" vasitəsilə göstərilən rəylər müştərilərin məhsul seçimini əhəmiyyətli dərəcədə asanlaşdıracaq.
Valyuta.Az xəbər verir ki, şirkət bu yeni funksiyanın 45 milyard məhsul siyahısı və "Gemini" adlı süni intellekt tərəfindən dəstəkləndiyini bildirib.
Bu yeniliklər "Google"ın mövcud "Google alış-veriş" sektoru çərçivəsindəki təcrübələrindən ilhamlanır. Məqsəd, insanların real dünyada da məlumatlı alış-veriş qərarları verməsini təmin etməkdir və "Google Lens" bu prosesi daha rahat hala gətirir.
Məsələn, diqqətinizi çəkən bir oyuncağın şəklini "Google Lens" vasitəsilə çəkərək, həmin oyuncağın yerli mağazalardakı stok vəziyyətini, rəylərini və oxşar məhsulları görə bilərsiniz. Bundan əlavə, oyuncağın "Amazon" və ya "Walmart" kimi fərqli pərakəndə satış platformalarında daha ucuz olub-olmadığını öyrənə bilərsiniz.
"Google"ın istehlakçı alış-veriş məhsullarından məsul vitse-prezidenti Lilian Rinkon (Lilian Rincon) açıqlamasında deyib: "Fiziki mağazalarda alış-veriş zamanı təxminləri aradan qaldırmaq üçün süni intellekt texnologiyasını tətbiq edərək yeni bir alət təqdim edirik. Hamımız alış-verişdən əvvəl rəylərə baxmağa, qiymətləri müqayisə etməyə və araşdırma aparmağa daha çox güvənirik".
Rəhim
