Rusiya prezidenti Vladimir Putinin ballistik raket hücumlarına nüvə silahı ilə cavab verməyə imkan verən doktrinanı təsdiqləməsi beynəlxalq aləmdə böyük əks-səda doğurub. Mümkün nüvə müharibəsi zamanı Rusiyanın hədəfə alacağı ölkələr dövlət televiziyasından verilən açıqlamalarla gündəmə gətirilib.
Publika.az xəbər verir ki,Putinin təsdiq etdiyi yeni doktrina Rusiyanın ballistik raketlə hücuma məruz qalacağı təqdirdə nüvə silahından istifadə variantını açıq şəkildə ifadə edir. Bu inkişaf Moskvanın beynəlxalq aləmdə nüvə müharibəsi ehtimalını açıq şəkildə ifadə etməsi kimi şərh olunur.
Rusiya dövlət televiziyasında verilən açıqlamalarda Kremlin İngiltərə və müttəfiqlərinə qarşı təhdidləri diqqət çəkib. Bildirilib ki, Ukraynaya verdiyi dəstək sayəsində mümkün nüvə müharibəsi zamanı İngiltərə Rusiyanın əsas hədəflərindən biri olacaq. Rusiyalı aparıcı İngiltərəyə “xüsusi maraq” göstərəcəklərini bildirib və Baltikyanı ölkələrdən Çexiyaya qədər bir çox Avropa ölkələrinin potensial hədəflər arasında olduğunu açıqlayıb.
Açıqlamada Rusiyanın nüvə raketləri ilə hədəfə alacağı ölkələr arasında Baltikyanı ölkələr, Çexiya, Rumıniya, Almaniya və Fransanın olduğu bildirilib. İngiltərə bu ölkələr arasında ənənəvi düşmən kimi qələmə verilib və xüsusi təhlükə olduğu vurğulanıb.
Rusiya dövlət televiziyasında yayımlanan açıqlamada İngiltərənin strateji bölgələrinin ətraflı şəkildə sıralandığı görülüb. Londondan başqa Mançester, Birmingem kimi şəhərlər, Şotlandiyada "Devonport" və "Clyth" kimi böyük hərbi bazalar, "Sheerness" limanı və "Chatham" da hədəfə alınıb.
