Ukrayna Müdafiə naziri “Storm Shadow” raketlərindən istifadə edilməsini şərh edib...
Ukraynanın müdafiə naziri Rustəm Umerov Ukrayna Silahlı Qüvvələrinin Rusiyaya hücum etmək üçün Britaniyanın “Storm Shadow” raketlərindən istifadə etməsi ilə bağlı məlumatları təsdiq və ya təkzib etməyib, lakin qeyd edib ki, Kiyev özünü müdafiə etməyə qadir olduğunu və cavab verə biləcəyini açıq şəkildə bəyan edir.
Poliqon xəbər verir ki, bu barədə CNN telekanalının məlumatında bildirilir.
“Ölkəmizi qorumaq üçün bütün vasitələrdən istifadə edirik, ona görə də təfərrüata varmayacağıq. Amma biz sadəcə olaraq aydın şəkildə bildiririk ki, biz özümüzü müdafiə etməyə qadirik və cavab verə bilərik”, deyə Umerov telekanalın müvafiq sualına cavab verib.
Nazir Ukraynanın özünü müdafiə edəcəyinə və bütün mümkün vasitələrlə cavab verəcəyinə inandırıb.
Qeyd edək ki, bundan əvvəl Bloomberg xəbər vermişdi ki, Ukrayna Silahlı Qüvvələri Rusiya ərazisindəki hədəfləri vurmaq üçün ilk dəfə Britaniyanın “Storm Shadow” qanadlı raketlərindən istifadə edib. Agentliyin adının açıqlanmasını istəməyən mənbəsi qeyd edib ki, Ukrayna hərbçiləri Rusiyadakı hərbi obyektlərə hücum edib.
Poliqon.info
