Ukraynalı oliqarx Dmitri Firtaş və həyat yoldaşı Lada Böyük Britaniya Maliyyə Nazirliyi tərəfindən antikorrupsiya sanksiyaları siyahısına daxil edilib. AFN.az xəbər verir ki, bu barədə xarici mediada məlumat yayılıb. Qərarın əsaslandırmasında qeyd edilir ki, Firtaş mədən lisenziyası almaq üçün məmurlara rüşvət verib və həmçinin Ukraynanın qaz ötürücü şəbəkələrindən əmlakın oğurlanmasında iştirak edib.Sanksiyalar arasında "Rodovid Bank" vasitəsilə Firtaşın vəsaitlərini yuduğu iddia edilən ukraynalı maliyyəçi Denis Qorbunenko da var.Sanksiyalar həmçinin “rüşvət verməkdə və əmlakı mənimsəməkdə” iştirak edən latviyalı oliqarx Aivars Lembergs və qızı Liqaya qarşı da tətbiq edilib. 2021-ci ildə Ventspils liman şəhərinin keçmiş meri Aivars Lembergs korrupsiya cinayətləri törətdiyinə görə 5 il müddətinə azadlıqdan məhrum edilib.Firtaş 2018-ci ildə Ukraynada regional qazpaylayıcı şirkətlərin 70%-nə sahib olub. 2014-cü ilin martında o, biznesmeni Ukrayna hüdudlarından kənarda korrupsiya cinayətlərində ittiham edən ABŞ-ın tələbi ilə Avstriyada saxlanılıb. O vaxtdan bəri sahibkar Avstriyada yaşayır və ekstradisiya ilə bağlı qərar gözləyir.2021-ci ilin iyununda Ukrayna Təhlükəsizlik Şurası Firtaşa qarşı şəxsi sanksiyalar tətbiq edib. 2022-ci ilin may ayında məhkəmənin qərarı ilə 26 qazpaylayıcı şəbəkə operatoru, o cümlədən sahibkarın strukturuna daxil olan regional qaz şirkətləri Aktivlərin İzlənməsi və İdarə Edilməsi Agentliyinə (ARMA) təhvil verilib və əldə olunan əmlak “Naftoqaz”a verilib. 2023-cü ilin mayında Ukrayna Təhlükəsizlik Xidməti Firtaşa və onun şirkətlərinin rəhbərlərinə qarşı dövlət büdcəsinə 480 milyon dollardan çox ziyan vurmaqla bağlı ittiham irəli sürüb.
