“Barselona”nın polyak mərkəz hücumçusu Robert Levandovski 2020-ci ildə “Qızıl top”suz qalması haqda söhbət açıb.
Arena.az xatırladır ki, o vaxt, 2020-ci ildə “Bayern”də çıxış edən Levandovski koronavirus pandemiyası (COVID-19) səbəbindən ona təqdim edilməmiş “Qızıl top”u almağa hazır olduğunu da vurğulayıb:
“O zaman mən mükafatın niyə verilmədiyini başa düşməmişdim. Bütün liqalarda oyunlar gedir, UEFA Çempionlar Liqası da davam edirdi. Bilirəm ki, bəzən futbol siyasət kimi işləyir, çünki futbol var olduqca, biznes, iş birliyi də var, iş birliyi isə var olduqca, siyasət də var.
İndi, 2020-ci ilin “Qızıl top”unu qəbul etməyə hazırammı? Əlbəttə!”, deyə Levandovski Rio Ferdinandın “YouTube” kanalına müsahibəsində bildirib.
Xatırladaq ki, 2019/2020 mövsümündə Robert Levandovski “Bayern”in heyətində bütün yarışlarda 47 oyuna çıxıb, 55 qol vurub və 10 məhsuldar ötürmə verib. Polyak hücumçu həmin mövsümdə Almaniya nəhəngi ilə bütün mümkün mükafatları qazanaraq, çox az futbolçuya müyəssər olmuş “sekstupl”a müvəffəq olub, yəni bir mövsüm ərzində mümkün 6 qənimətin hamısını özünün qənimtlər muzeyinə toplaya bilib: Almaniya Bundesliqası, Almaniya Kuboku, Almaniya Super Kuboku, Çempionlar Liqası, UEFA Super Kuboku və FIFA Klub Dünya Kuboku.
Robert Levandovski “Barselona”ya 2022-ci ilin iyul ayında 45 milyon avro məbləğ müqabilində “Bayern”dən keçib. Tərəflər arasındakı müqavilə daha 1 il müddətinə uzadılması imkanı ilə 2026-cı il iyun ayının sonuna qədər qüvvədədir.
Polyak hücumçu cari mövsümdə “Barselona”nın heyətində 17 oyuna çıxıb, 19 qol vurub və 2 məhsuldar ötürmə verib. Levandovskinin Kataloniya klubu üçün çıxışı ümumilikdə 112 oyun, 78 qol və 19 məhsuldar ötürmədən ibarətdir.
Təcrübəli hücumçu karyerası ərzində “Borussiya” (Dortmund), “Lex” (Poznan), “Zniç”, “Legiya” (Varşava) və “Delta” komandalarında da çıxış edib.
Robert Levandovski hazırda kapitanı olduğu və 2008-ci ilin sentyabr ayında debüt etdiyi Polşa yığmasının heyətində 156 oyun keçirib, 84 qol vurub, 35 məhsuldar ötürmə verib. Robert hər iki göstərici üzrə Polşa yığma komandasının mütləq rekordçusudur.
“Transfermarkt” internet-portalı 36 yaşlı polyak hücumçunun transfer dəyərini 15 milyon avro məbləğində qiymətləndirir.
