"Ethereum"un "Bitcoin" qarşısındakı dəyəri 0,032 səviyyəsinin altını test edərək 2021-ci ilin martından bəri ən aşağı həddə enib.
Valyuta.Az bildirir ki, bu eniş, "Bitcoin"in güclü yüksəliş trendinə girdiyi bir dövrə təsadüf edir. "Bitcoin" yeni rekord səviyyələrə çatarkən, "Ethereum"un "Bitcoin"-lə eyni sürətlə yüksələ bilməməsi kriptovalyuta bazarındakı balansın dəyişməsi ilə izah edilir.
ETH/BTC nisbəti kəskin enir
ETH/BTC nisbəti Asiya ticarət saatlarında təxminən 1,5% azalaraq ilin əvvəlindən bəri 40%-dən çox düşüb. "Bitcoin"in bu artımı əsasən ABŞ-də spot "Bitcoin" birja fondlarının (ETF) təsdiqlənməsi və kriptovalyuta yönümlü Respublikaçı namizəd Donald Trampın seçilməsi ilə əlaqələndirilir. Lakin "Ethereum" bu dövrdə BTC-yə oxşar performans göstərə bilməyib.
"Ethereum"un 6.000 dollara çatması mümkündürmü?
ETH/BTC nisbəti 2021-ci ildən bəri ən aşağı səviyyəyə düşsə də, ETH-yə olan tələbin artması ilə 0,34 səviyyəsinə qədər yüksəlib. Bu artım ETH-nin BTC qarşısında dəyər itkisində dip nöqtəyə çatdığı ehtimalını artırır.
Analitik Benjamin Cowen-in fikrincə, "Ethereum"un qiyməti 6.000 dollara çata bilər. Onun logaritmik artım modeli, ETH-nin ümumi böyümə trendinə uyğun olaraq müsbət istiqamətdə hərəkət edə biləcəyini göstərir. "Ethereum" BTC qarşısında dəyər itirsə də, USDT qarşısında müqavimət səviyyələrini aşaraq müsbət hərəkət göstərir.
"Ethereum"-un 3.000 dollarlıq səviyyəni aşması bazarda inamın artması ilə uzunmüddətli böyümə potensialını gücləndirə bilər. DeFi və şəbəkə sektorlarındakı inkişaf, ETH-nin bazar payını artırması üçün böyük əhəmiyyət kəsb edir.
"Ethereum" və "Solana" rəqabəti
"Ethereum" həm "Bitcoin" qarşısında dəyər saxlamaq, həm də "Solana" qarşısında ağıllı müqavilə platforması kimi rəqabət aparmaq məcburiyyətindədir. Bu vəziyyət, onun gələcək dəyəri ilə bağlı qeyri-müəyyənlik yaradır.
Digər tərəfdən, "Solana" bu il protokol haqları və mərkəzsiz birja ("DEX") ticarət həcmləri baxımından "Ethereum"u geridə qoyub. Şəbəkədə memcoin-lərin populyarlığının artması "Solana"nın sürətini daha da artırıb və onu "Ethereum"un əsas rəqibi mövqeyinə gətirib.
"Solana"nın böyüməsi davam edir
Üç ildən sonra "Solana" (SOL) nəhayət tarixi maksimum qiymət rekordunu yeniləyərək 260 dolları keçib və yeni mərhələyə yüksəlib.
"Coinbase"dən (NASDAQ: COIN) əldə edilən məlumatlara əsasən, "Solana" cümə axşamı günortadan sonra 260 dollarlıq rekordu qırıb.
"Solana" son 24 saatda 11%, illik isə təxminən 360% artımla 263 dollar səviyyəsində ticarət olunub.
Blockchain məlumatlarına görə, "Solana" gündəlik şəbəkə gəlirlərində 11,8 milyon dollar əldə etdiyi halda, "Ethereum" 5,3 milyon dollar ilə məhdudlaşıb. "Solana"nın "DEX" ticarət həcmi son 24 saatda 6,24 milyard dollara çatıb, "Ethereum"un 850 milyon dollarlıq göstəricisini xeyli geridə qoyub.
"Syncracy Capital" analitiki Ryan Watkins, "Solana"nın bir il ərzində protokol haqlarını 343 milyon dollara çatdırdığını, "Ethereum"un isə 178 milyon dollarda qaldığını qeyd edib. "Solana", yalnız texniki üstünlükləri ilə deyil, həm də məlumat dəstəyi ilə bazarda mövqeyini gücləndirib.
Bu böyümə "Solana"nın "Ethereum"un ağıllı müqavilə bazarındakı liderliyinə ciddi şəkildə meydan oxuduğunu təsdiqləyir.
Aydın
