Ukrayna prezidenti Volodimir Zelenski Rusiya prezidenti Vladimir Putinin Ukraynaya yeni tip ballistik raketlə hücumu ilə bağlı bəyanatı “bu il müharibəni qızışdırmaq üçün ikinci addımı atdığını etiraf etdi" deyə qiymətləndirib.
V.Zelenski Rusiyanın yeni tip ballistik raketlə ölkəsinə hücumu ilə bağlı videomüraciət paylaşıb.
Vladimir Putinin Ukraynanın Dnepr şəhərindəki hərbi sənaye kompleksinə “Oreşnik” adlı orta mənzilli raketlə hücum həyata keçirdiklərini açıqladığını xatırladan Zelenski “Putin bu il müharibəni qızışdırmaq üçün ikinci addımı atdığını etiraf etdi. Putin yeni ballistik raketin Ukraynanın ən böyük şəhərlərindən birini vurduğunu söylədi" deyib.
Rusiyanın ən azı 11 min Şimali Koreya əsgərini müharibəyə cəlb etdiyini deyən Zelenski ölkəsinə qarşı hücumda ilk dəfə yeni rus ballistik raketindən istifadə edildiyini bildirib.
Rusiyanın bu raketdən istifadə etməklə Birləşmiş Millətlər Təşkilatının Nizamnaməsini pozduğunu bildirən Ukrayna lideri "Bu, müharibənin miqyasının və vəhşiliyinin açıq və ciddi artmasıdır. Həmçinin Rusiyanın qətiyyən sülh istəmədiyinin başqa bir sübutudur" deyib.
Zelenski Rusiya-Ukrayna müharibəsinin başlanmasına görə məsuliyyət daşıdığı Rusiya prezidentinin bu müharibəni 1000 gündən çox davam etdirdiyini də bildirib.
Ukraynanın gərgin hücumlar altında özünü müdafiə etmək hüququna malik olduğunu vurğulayan Zelenski Ukraynanın bu müharibədə daha əvvəl də uzaqmənzilli silahlardan istifadə etdiyini vurğulayıb.
Ukrayna prezidenti dünyanın Rusiyanın hücumlarına kifayət səviyyədə reaksiya vermədiyini və Rusiyanın bu müharibəni davam etdirmək üçün “bütün vasitələrdən” istifadə etdiyini bildirib.
