Çevik Dəstək Qüvvələri (ÇDK) Sudanın cənub-şərqində yerləşən Mavi Nil əyalətinə qəfil hücum edərək əl-Tadamun bölgəsindəki Cerive və Roro qəsəbələrini nəzarətə götürüb. Ordu qüvvələri qonşu Sennar vilayətinin əl-Lenkdi şəhərini də geri alıb.
Hafta.az-ın Şarkul Avsat-a istinadən yazdığına görə, ÇDK üzvləri X platformasında yayımladıqları videolarla təsdiqləyiblər ki, onlar Sudan ordusunun dördüncü diviziyasının qərargahının yerləşdiyi vilayətin mərkəzi Əd-Damazindən təqribən 70 kilometr aralıda yerləşən ərazilərdə olublar.
ÇDK sentyabrda irəliləyərək Roro qəsəbəsinə nəzarəti ələ keçirdi, lakin daha sonra Sennar əyalətindəki əd-Dali və əd-Mazumda yerləşdirilmiş əsas qüvvələrinə qoşulmaq üçün geri çəkildi.
Digər tərəfdən, media orqanları ordunun Sennar əyalətinin mərkəzi Sinqadan təxminən 60 kilometr aralıda yerləşən əl-Lenkdi qəsəbəsini geri aldığını açıqlayıb.
Oktyabrda ordu Sennardakı əd-Dendir və əs-Suki şəhərlərini, həmçinin bu şəhərləri əhatə edən bəzi kiçik qəsəbələri geri alıb. Hesabatlar ordunun iyunda ÇDK tərəfindən ələ keçirilən Sinqa şəhərinə doğru əhəmiyyətli irəliləyiş əldə etdiyini göstərir.
Sudanın qərbindəki Şimali Darfur əyalətinin mərkəzi Əl-Fəşirdə sakitlik bir tərəfdən ordu ilə müttəfiq silahlı qrupların birgə qüvvələri, digər tərəfdən isə ÇDK arasında yenidən toqquşmalarla pozulub. Yerli mənbələr bildiriblər ki, ÇDK ağır artilleriya ilə 6-cı Hərbi Diviziya Komandanlığına doğru bir sıra yaşayış məntəqələrini bombalayıb.
Mənbələr, "Bombardman şəhərdə bir neçə gün davam edən sakitlikdən və döyüşən tərəflər arasında quru toqquşmalarının azalmasından sonra baş verib" deyə bildirib.
Ordunun Əl-Fəşirdəki 6-cı Piyada Diviziyasından verilən açıqlamada şəhərin əvvəlki günlərlə müqayisədə 80 faiz daha sakit olduğu bildirilib.
Sudanın rəsmi xəbər agentliyi SUNA-nın məlumatına görə, ÇDK milisləri bir sıra məhəllələri fərq qoymadan bombalayıb.
Diviziyadan verilən açıqlamada, döyüş təyyarələrinin düşmən mövqelərinə 3 hava zərbəsi endirdiyi, böyük müvəffəqiyyət qazandığı və milislərin şəhərin şərqinə çəkildiyi bildirilib.
Ordu “vəziyyətin nəzarət altında olduğunu və qüvvələrinin bütün döyüş oxları üzrə irəlilədiyini” təsdiqləyib.
Silahlı qruplardan ibarət müştərək qüvvə “ÇDK-nın əl-Fəşirə qarşı müxtəlif oxlardan başlatdığı şiddətli hücumların qarşısını aldığını” bildirib.
Əl-Fəşir sakinlərinin sözlərinə görə, minlərlə ailə mülki əraziləri hədəfə alan artilleriya və raket atəşinə görə şəhəri tərk etməyə davam edir. Rəsmi statistika göstərir ki, ötən ildən bəri şəhərdə baş verən qarşıdurmalarda azı min dinc sakin həlak olub və yaralanıb.
BMT və Sudandakı humanitar tərəfdaşların məlumatına görə, 2023-cü ilin aprelindən başlayan münaqişədən bəri 188 mindən çox insan həlak olub, 33 mindən çox insan isə yaralanıb.
