“Biz daha geniş regional münaqişə axtarmırıq. Biz Rusiya ilə müharibə istəmirik. Düşünürəm ki, biz bunu həm bu tribunadan, həm də bu administrasiyadan çox açıq şəkildə ifadə etmişik. Amma bizim görəcəyimiz və həm ictimai, həm də özəl kanallarda açıq şəkildə bildirdiyimiz şey budur: biz başqa bir ölkənin qonşusuna təcavüz etməsinə dözməyəcəyik və onun mübarizəsində Ukraynanı dəstəkləməyə davam edəcəyik. Bu, sirr deyil, əvvəldən məlum idi”.
Reyting.az xəbər verir ki, bunu mümkün Amerika-Rusiya müharibəsinə dair suala cavabında Pentaqonun mətbuat üzrə rəsmisi Sabrina Sinq deyib.
O xatırladıb ki, Amerika 2022-ci ildə Rusiyaya xəbərdarlıq edib ki, bunu etməsin (Ukraynaya hücum), amma hər halda bunu etdilər: “Bunun nəticələri var, lakin biz bu vəziyyəti daha geniş regional münaqişəyə çevirmək istəmirik. Biz Rusiya ilə müharibəyə can atmırıq, lakin Ukraynanı dəstəkləmək üçün müttəfiqlərimiz və tərəfdaşlarımızla əlaqə saxlayacağıq”.
Pentaqon rəsmisi əlavə edib ki, onlar bu münaqişədə Şimali Koreya əsgərlərinin də iştirak etdiyini görürlər: “Amma siz Amerika əsgərlərini sahədə görmürsünüz və bu administrasiyanın niyyəti bu deyil”.
Pentaqon rəsmisi Rusiya prezidenti Vladimir Putinin nüvə savaşına dair son mövqeyini də şərh edib: “Ortaya çıxan məsuliyyətsiz bəyanatlardan hər zaman narahat olacağıq. Biz, təbii ki, Rusiyanın gərginliyi artırmaq üçün atdığı addımlardan, xüsusən də Şimali Koreya qüvvələrini yerləşdirməsindən narahatıq və bunun cavabını tapacağını bəyan etmişik. Biz bu məsələdə Ukrayna ilə işləyirik və onları meydanda dəstəkləməyə davam edirik. Lakin biz Rusiya ilə müharibə istəmirik, bu, bizim niyyətimiz deyil. Amma biz mütləq Ukraynanı dəstəkləməyə davam edəcəyik və prezident əvvəldən bu məsələdə çox açıq şəkildə çıxış edib”.
ELÇİN
