Xorvatiya millisinin və “Mançester Siti”nin mərkəz yarımmüdafiəçisi Mateo Kovaçiç zədə səbəbindən 3-4 həftə futbol oynaya bilməyəcək.
Arena.az xəbər verir ki, bu barədə İngiltərə çempionunun baş məşqçisi Xosep Qvardiola məlumat verib.
O, İngiltərə Premyer Liqasının 12-ci turunda qarşılaşacaqları “Tottenhem”lə oyundan öncə jurnalistlərə açıqlamasında xorvatiyalı futbolçunun təxminən bir həftə yaşıl meydanlardan kənarda qalacağını bildirib. Amma Kovaçiçin zədəsi barədə təfərrüatlar açıqlanmayıb.
Xatırladaq ki, 30 yaşlı xorvatiyalı futbolçu UEFA Millətlər Liqasında Şotlandiya (0:1) və Portuqaliyaya (1:1) qarşı keçirilən oyunlarda Xorvatiya yığmasının heyətində yer alıb. Son turda baş tutan Portuqaliya ilə ev oyununda (1:1) Kovaçiç fasilə zamanı əvəzlənmişdi. Onun məhz həmin görüşdə zədələndiyi ehtimal olunur.
“Mançester Siti” Mateo Kovaçiçi 2023-cü ilin iyul ayında İngiltərənin digər klubu “Çelsi”dən 29 milyon avroya transfer edib. Təcrübəli oyunçunun bu klubla müddəti 2027-ci ilin 30 iyununa qədər olan müqaviləsi var.
Kovaçiç bu mövsüm “Mançester Siti”nin heyətində 15 oyuna çıxıb, 3 qola imza atıb. O, “şəhərlilər”lə bütövlükdə 61 oyun keçirib, 6 qol vurub, 1 məhsuldar ötürmə müəllifi olub.
Mateo Kovaçiç “Mançester Siti”də İngiltərə Premyer Liqasının, UEFA Super Kubokunun və FIFA Klub Dünya Kubokunun qalibi olub. O, cari mövsümə də İngiltərə Super Kubokunu qazanmaqla başlayıb.
Kovaçiç daha öncə “Çelsi” ilə də UEFA Çempionlar Liqasını, Avropa Liqasını, UEFA Super Kubokunu, FIFA Klub Dünya Kubokunu qazanıb. Bununla yanaşı, Kovaçiç 2019/2020 mövsümündə nəticələrinə görə, “Çelsi”nin ən yaxşı futbolçusu seçilib.
Mateo 2013-cü ilin mart ayında debüt etdiyi Xorvatiya yığmasının heyətində 108 oyuna çıxıb. O, bu oyunlarda 5 qol və 9 məhsuldar ötürmə ilə yadda qalıb.
Yarımmüdafiəçi “Çelsi” və “Mançester Siti”dən öncə “Real”, “İnter” və “Dinamo” (Zaqreb) klublarının da formasını geyinib.
“Transfermarkt” internet-portalı 30 yaşlı Mateo Kovaçiçi 30 milyon avro məbləğində qiymətləndirir.
