“Əl-Nəsr”in portuqal hücumçusu Kristiano Ronaldo “YouTube”da məşhur bloqçu MrBeast’in rekordunu qırmaq niyyətində olmadığını bildirib.
Arena.az məlumat verir ki, ulduz futbolçu bu barədə özünün şəxsi “YouTube” kanalında, qonaq olaraq dəvət etdiyi MrBeast ilə dialoqu zamanı söhbətləşib:
Kristiano: Səncə, mən səni “YouTube” abunəçilərinin sayında ötüb keçə bilərəmmi?
MrBeast: Yox, yox! (gülür). Ancaq hər şey sənin nə edəcəyindən asılıdır. Başqa futbolçuları dəvət etməyə, oyunlarda ən yaxşı məqamlarına qarşılığı çəkməyə başlasan, o zaman uğur qazanacaqsan. Nəbzini tapıb tutsan, öldürücü məzmun yarada bilərsən.
Kristiano: Bu, sənin rekordundur. Düzünü desəm, onu qırmaq istəmirəm.
Xatırladaq ki, MrBeast-in “YouTube” kanalı dünyada ən məşhurdur. MrBeast (əsl adı Ceyms Stiven Donaldson – redaktorun qeydi) 330 milyon izləyici auditoriyası ilə dünyanın ən məşhur “YouTube” bloqçularından biridir. Kristiano Ronaldonun yeni yaradılmış şəxsi kanalının isə 65 milyon abunəçisi var.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib.
Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 15 oyuna 10 qol və 3 məhsuldar ötürmə ilə fərqlənib.
Kristianonun “Əl-Nəsr” karyerası ümumilikdə 79 oyun, 68 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 215 oyuna 135 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı veteran hücumçunun transfer dəyərini 15 milyon avro məbləğində qiymətləndirir.
