Dünyanın bir çox ölkəsində müxtəlif iri atraksionlardan ibarət lunaparklar var. Belə parklar uşaqlarla yanaşı, böyüklərin də sevimlisidir. Təəsüf ki, öncədən Bakıda Bulvar, Ağ Şəhər və N.Nərimanov ərazilərində böyük ataksionlardan ibarət parklar olsa da, indi yoxdur. Bəs görəsən paytaxtımızda luna parklar salınacaqmı? Bunun üçün nəzərdə tutulmuş hər hansı layihə varmı?
Mövzu ilə bağlı Şəhərsalma sahəsində tanınmış mütəxəssis, memar, sənətşünaslıq doktoru, Bakı Abadlıq Xidmətinin baş memarı Elçin Əliyev Moderator.az-a danışıb. Bildirib ki, paytaxtımızda lunaparkların salınmasın lüzum yoxdur:
"Hesab edirəm ki, Bakıda uşaqların əyləncəsi üçün hər cür imkanlar yaradılıb. Əyləncə nöqteyi-nəzərindən onlar üçün xüsusi bir məkana ehtiyac olmadığını düşünürəm. Mənim də 10 yaşlı qızım var. Onunla yeni açılan alış-veriş mollarında, eyni zamanda digər məkanlada olan uşaq əyləncə məkanlarını gəzmişik.
Nəzərinizə çatdırım ki, Bakıda xüsusi uşaqlar üçün tikilmiş bir neçə parklar var. Bundan başqa bütün böyük ticarət mərkəzlərində tərkibində uşaq atraksionları mövcuddur. Son illər dövlət tərəfindən yeni salınan parklarda da uşaqları nəzərə alınır. Hər kəs öz evinin önündəki parka gedərək uşaqlarını oradakı atraksionlarda ödənişsiz əyləndirə bilir. Baş memar kimi bilirəm ki, biz bütün kəndlərdə də, məsələn, uşaq meydançaları yaratmışıq. Ona görə hesab edirəm ki, paytaxtımızda uşaqlar üçün əyləncə mərkəzlərinin yaradılmasına ehtiyac yoxdur".
