COP29 çərçivəsində Qadınlar Proqramı və Nizami Gəncəvi Beynəlxalq Mərkəzinin birgə təşkilatçılığı ilə “UNFCCC Gender Günü” çərçivəsində keçirilən “Gender Məsuliyyətli Rio Konvensiyaları Sinerjisinə Nail Olmaq” adlı yüksək səviyyəli yan tədbir keçirilib.
Milli Məclisin komitə sədri, professor Hicran Hüseynova tədbirdə çıxış edərək iqlim dəyişikliyi ilə mübarizədə qadınların rolunun çox önəmli olduğunu bildirib: “Dünyanın yarısını təşkil edən qadınların və qızların səlahiyyətlərinin artırılması, həmçinin onların kollektiv iqlim tədbirlərində fəal iştirakı təmin edilməlidir. İnkişaf etməkdə olan ölkələrdə qadınlar elektrik enerjisi, qida, su kimi məişət məsələlərinə, həmçinin gənc və yaşlı nəsillərin qayğısına qalmaqda böyük rol oynayırlar. Lakin iqlim dəyişikliyi bu yükü daha da ağırlaşdıra bilər.”
H.Hüseynova vurğulayıb ki, qadınlar və qızlar, iqlim dəyişikliyi ilə mübarizəyə daha çox səlahiyyətlərlə qoşulurlar: “Bir çox ölkə, milli iqlim fəaliyyət planlarına gender perspektivlərini daxil edərək iqtisadi sektorlarda bu məsələləri prioritetləşdirir. BMT-nin İqlim Dəyişikliyi üzrə Çərçivə Konvensiyası (UNFCCC) istiqamətində ölkələr, qadınların tam və bərabər iştirakını təmin edən Gender Fəaliyyət Planları qəbul edirlər. Bu, qadınların qərar qəbuletmə proseslərində mühüm rol oynamasına imkan verir.”
Komirə sədri əlavə edib ki, iqlim strategiyalarında və qərar qəbuletmə mövqelərində gender bərabərliyinə nail olmaq üçün məqsədyönlü tədbirlər görülməlidir: “Qadın sahibkarları, yaşıl iqtisadiyyat prinsiplərinə uyğun layihələr həyata keçirməyə təşviq etməliyik. Eyni zamanda, qadınlar ekstremal hava hadisələri nəticəsində kişilərə nisbətən daha çox zərər çəkirlər. Məsələn, təbii fəlakətlərdə qadınların və uşaqların ölüm ehtimalı kişilərdən 14 dəfə çoxdur. Qadınlar, iqlim böhranının ön cəbhəsində olduqları üçün qlobal istiləşmənin səbəblərini azaltmaq və onun təsirlərinə uyğunlaşmaq üçün unikal imkanlara malikdirlər. Onların dəyişiklik yaratma gücü və qızların iqlim dəyişikliyi ilə mübarizədə oynadıqları vacib rol bizim gələcəyimiz üçün əvəzsizdir.”
Orxan Vahidoğlu, “İki sahil”
