2024-cü ilin ilk 10 ayı ərzində (yanvar-oktyabr) Azərbaycanın idxalında əsas ölkələr siyahısında Avstraliya 1 milyard 35 milyon 985 min dollar məbləğ ilə 4-cü yeri tutub. Bu dövrdə Azərbaycandan Avstraliyaya cəmi 114 min dollarlıq mallar ixrac edilib.
FED.az xəbər verir ki, bu barədə Dövlət Gömrük Komitəsinin aylıq statistikasında bildirilir.
Halbuki, 2023-cü ilin 10 ayı ərzində Avstraliyanın adı Azərbayanın idxalında əsas ölkələr siyahısında yox idi. 2023-cü ilin 10 ayında Azərbaycanın Avstraliyadan idxalı cəmi 9 milyon 4 min dollar olmuşdu, Azərbaycandan Avstraliyaya ixrac isə 29 milyon 208 min dollar təşkil etmişdi. Tam 2023-cü il ərzində isə Azərbaycanın Avstraliyadan idxalının həcmi cəmi 11 milyon 688 min dollar məbləğində qeydə alınmışdr.
Bu il Azərbaycanın Avstraliyadan 115 dəfə çox məbləğə - 1 milyard 36 milyon dollara hansı malları aldığı açıqlanmayıb. (Marja)
