İndi 90-cı illərlə müqayisədə iki dəfə çox gənc öd kisəsi xərçəngindən əziyyət çəkir. Xəstəliyin artmasının səbəbləri ətraf mühitin çirklənməsi, pis vərdişlər və məşğul həyat tərzi ola bilər.
HİT.az xəbər verir ki, bu barədə "Daily Mail"ə məşhur britaniyalı onkoloq və Ümumdünya Səhiyyə Təşkilatının xərçənglə mübarizə proqramının keçmiş rəhbəri Kerol Sikora məlumat verib.
Öd kisəsi, qidanın normal həzm olunması üçün lazım olan bir maye olan ödün saxlanması və ifraz edilməsindən məsul olan həzm sisteminin bir orqanıdır. Bu, sağ tərəfdə yerləşən və öd yolları ilə qaraciyərlə birləşən armud formalı anbardır. Son vaxtlara qədər, öd kisəsi xərçəngi nadir bir xəstəlik hesab olunurdu, lakin Böyük Britaniyanın "Cancer Research"ə görə, son onilliklərdə onun yayılması əhəmiyyətli dərəcədə artıb.
Sikoranın sözlərinə görə, xəstəlik getdikcə daha çox gəncləri - 50 yaş və daha kiçik xəstələri əhatə edir. Mümkün səbəb müasir həyat tərzində dəyişikliklərdir. Onkoloq vurğulayıb ki, ətraf mühitin çirklənməsi, spirt istehlakı, qeyri-sağlam qidalanma və getdikcə stresli həyat tərzinin birləşməsi həzm mikrobiomuna dolayı yolla mənfi təsir göstərir. Bu da öz növbəsində xərçəngin inkişaf riskinə təsir edə bilər.
Xəstəliyin artmasının genetik səbəblərdən və hərtərəfli, yüksək dəqiqliklə aparılan müayinələr nəticəsində erkən aşkarlanması ilə də bağlı ola biləcəyi qeyd edilir.
Samir
