Hindistan 2023-cü ilin sentyabrında Rusiyadan almaz idxalını keçən ilin eyni dövrü ilə müqayisədə 96 faiz azaldıb. Bu dramatik eniş G7 ölkələrinin Rusiya almazlarına qarşı sanksiyaları sərtləşdirməsindən sonra baş verib.
Hafta.az-ın yazdığına görə, Hindistan Ticarət və Sənaye Nazirliyi bildirib ki, sentyabrda Rusiyadan cəmi 37 min karat almaz idxal edilib. Ötən il bu rəqəm 917 min karat olub.
Xatırladaq ki, G7 ölkələri bu il yanvarın 1-dən Rusiya almazlarının idxalını tamamilə qadağan edib. Martın 1-dən etibarən bu qadağa üçüncü ölkələrdə emal olunmuş Rusiya almazlarına da şamil edilib.
Moskva bu sanksiyaları qeyri-qanuni hesab edir və onların qlobal ticarətə təsirini pisləyib.
Rusiyanın almaz idxalında rolu azaldığı halda, Hindistan almaz ehtiyacını Honq-Konq, Belçika və Birləşmiş Ərəb Əmirliklərindən ödəyir. Bununla belə, bu ölkələrdən idxal da azalır. Belə ki, Honq-Konqdan idxal 5 faiz azalaraq 448 milyon dollara, Belçikadan idxal 16 faiz azalaraq 186 milyon dollara, BƏƏ-dən idxal 12 faiz azalaraq 581 milyon dollar olub.
ABŞ və Çin kimi əsas bazarlarda tələbin azalması Hindistanın almaz ixracatında da azalmaya səbəb olub. 2023-2024-cü maliyyə ilində ixrac 27,58 faiz azaldığı halda, 2024-2025-ci maliyyə ilinin birinci rübündə bu azalma 15 faiz təşkil edib.
Hindistan dünya almaz ticarətinin mərkəzi olsa da, sektordakı qlobal böhran ölkənin bu sahədə liderliyini çətinləşdirir. Düşən qiymətlər və tələb səbəbiylə Yeni Dehli 2023-cü ilin oktyabrında kobud almaz idxalına iki aylıq qadağa qoyub.
Hindistanın Rusiya almazlarından uzaqlaşması onun G7 sanksiyalarına əməl etmək səyinin nəticəsidir.
Lakin bu vəziyyət almaz sənayesindəki ümumi böhranı daha da dərinləşdirir. Sənayedəki mövqeyini qorumaq üçün Hindistan yeni bazarlar inkişaf etdirməli və innovasiyalar vasitəsilə dəyər zəncirini gücləndirməlidir.
Bu vəziyyət həm Rusiyanın almaz sektoru üçün alternativ bazarlar axtarışını sürətləndirə bilər, həm də Hindistandan qlobal ticarətdə yeni strategiyalar hazırlamağı tələb edə bilər.
