1912-ci ildə Liverpulda doğulan və İkinci Dünya Müharibəsinin sağ qalan ən yaşlı kişi veteranı olan Con Tinnisvud (John Tinniswood) 112 yaşında vəfat edib.
Valyuta.Az "The Guardian"a istinadən xəbər verir ki, 26 avqust 1912-ci ildə Liverpulda anadan olan Tinnisvud, bu ilin aprelində dünyanın ən yaşlı kişisi kimi qeydə alınmışdı. O, bazar ertəsi Merseysayd əyalətində yerləşən Sautport şəhərindəki "Hollis" adlı qocalar evində, ailəsinin dediyinə görə, “musiqi və sevgi ilə əhatələnmiş şəkildə” dünyasını dəyişib.
Ailəsinin bəyanatında qeyd olunub:
“Con həmişə təşəkkür etməyi sevirdi. Buna görə onun adından illər ərzində ona qayğı göstərən hər kəsə, xüsusən də "Hollis" qocalar evinin işçilərinə, ailə həkimlərinə, tibb bacılarına, məşğulluq terapevtinə və digər NHS (Milli Səhiyyə Xidməti) personalına təşəkkür edirik.”
Bir qızı, dörd nəvəsi və üç nəticəsi olan Tinnisvud qeydə alınmış dördüncü ən yaşlı britaniyalı kişi kimi tarixə düşüb.
Ailə üzvləri əlavə edib:
“Con çox gözəl xüsusiyyətlərə malik idi. O, ağıllı, qətiyyətli, cəsur, hər hansı bir böhranda sakit, riyaziyyatda istedadlı və çox gözəl söhbət yoldaşı idi.”
Onların dediyinə görə, Con 100-cü doğum günündən qısa müddət əvvəl "Hollis" qocalar evinə köçüb və onun həyat eşqi ilə dolu davranışı qocalar evinin işçiləri və digər sakinləri üçün ilham mənbəyi olub.
Bu ilin əvvəlində "Ginnesin Rekordlar Kitabı"na açıqlamasında o, 112 yaşına çatmağın ona xüsusi bir hiss yaşatmadığını bildirib:
“Mən özümü bu yaşda hiss etmirəm, buna görə də həyəcanlanmıram. Yəqin ki, məhz buna görə bu yaşa çatmışam. Hər şeyi axarına buraxıram, bu qədər uzun yaşamağımın səbəbini isə heç bilmirəm. Mənim üçün mənim heç kimdən bir fərqim yoxdur.”
Xüsusi bir sirri olmadığını qeyd edən Tinnisvud, gəncliyində çox gəzməyi və aktiv olmağı vərdiş halına gətirdiyini söyləyib. O, cümə günləri qızardılmış balıq və kartof yeməyi istisna olmaqla, xüsusi bir pəhrizə riayət etmədiyini bildirib:
“Onlar nə versə, mən də onu yeyirəm, hamı da elədir,” - deyə o əlavə edib.
Titanikin batdığı il dünyaya gələn Tinnisvud, hər iki dünya müharibəsinin şahidi olub və dünyanın ən yaşlı İkinci Dünya Müharibəsi veteranı kimi tanınıb. O, ordunun ödəmə korpusunda inzibati vəzifədə çalışıb.
Mühasibat və audit sahələrində işlərlə yanaşı, itkin düşən əsgərlərin yerini müəyyənləşdirmək və ərzaq tədarükünü təşkil etmək kimi logistik vəzifələri yerinə yetirib.
Daha sonra "Shell" və "BP" şirkətlərində mühasib kimi çalışıb və 1972-ci ildə təqaüdə çıxıb.
Tinnisvud, bu ilin aprel ayında 111 yaşında ikən, 114 yaşında vəfat edən venesuelalı Xuan Visente Peresdən (Juan Vicente Pérez) sonra "dünyanın ən yaşlı kişisi" titulunu almışdı.
Qeyd edək ki, dünyanın ən yaşlı insanı isə hazırda 116 yaşında olan yaponiyalı Tomiko İtookadır (Tomiko Itooka).
Rəhim
