Azərbaycan Dillər Universitetinin (ADU) prorektoru Şəfəq Şahməmmədovanın başçılığı ilə nümayəndə heyəti Çin Xalq Respublikası (ÇXR) Təhsil Nazirliyinin keçirdiyi Ümumdünya Çin Dili Konfransında iştirak edib. Çin dili və mədəniyyətinin təbliği üzrə təhsil mərkəzləri şəbəkəsinin yaradılmasının 20-ci ildönümünə həsr olunmuş konfransa ÇXR-in hökumət və aparıcı ali təhsil müəssisələrinin nümayəndələri, Konfutsi institutlarının rəhbərləri, tanınmış elm xadimləri və diplomatlar da daxil olmaqla 160 ölkə və regiondan 2 mindən çox iştirakçı qatılıb.
Bu barədə AZƏRTAC-a ADU-nun Konfutsi İnstitutundan məlumat verilib. Əsas mövzusu “Ünsiyyət, inteqrasiya, varislik və innovasiya” olan konfransın açılış mərasimində ÇXR sədrinin müavini Han Çjen və təhsil naziri Huay Tszinpen çıxış ediblər. Onlar Çin və dünya xalqları arasında dostluq və qarşılıqlı anlaşmanın möhkəmləndirilməsi məqsədilə Çin dilində beynəlxalq təhsilin təşviqinə hərtərəfli dəstəyin davam etdiriləcəyini bildiriblər. Qeyd olunub ki, Çin dilinin öyrənilməsi dünyada daha çox insanın Çin haqqında çoxşaxəli və geniş biliklər əldə etməsinə imkan verir.
Açılış mərasimində Han Çjen Çin Xalq Respublikasının Sədri Si Cinpinin konfrans iştirakçılarına ünvanladığı təbrik məktubunu oxuyub.
Tədbir çərçivəsində ADU-nun nümayəndə heyəti HSK 3.0 Çin dili bilik imtahanının yeni test proqramına, xaricdə Çin dilinin tədrisi standartlarına, süni intellektdən istifadə edərək tədrisdə innovativ tendensiyalara, xaricdə Çin dili müəllimlərinin hazırlanmasına, Konfutsi institutlarının inkişaf perspektivlərinə, HSK test mərkəzlərinin işinin təşkilinə həsr olunmuş bir sıra panel iclasları və paralel konfrans forumlarında müzakirələrdə iştirak ediblər.
Konfransın tematik seminarında ADU-nun Konfutsi İnstitutunun direktorları Li Zihua və Rafiq Abbasov iştirak ediblər. R.Abbasov seminar iştirakçılarını tarixi İpək Yolunun dirçəldilməsi üçün “Bir kəmər, bir yol” qlobal Çin layihəsinin həyata keçirilməsi üzrə ixtisaslaşmış ADU-nun Konfutsi İnstitutunun elm, tədris və maarifləndirici fəaliyyəti ilə tanış edib. O bildirib ki, “Azərbaycan Respublikası ilə Çin Xalq Respublikası arasında strateji tərəfdaşlığın yaradılması haqqında Birgə Bəyannamə”də hər iki ölkənin təhsil müəssisələrində Çin və Azərbaycan dillərinin tədrisinin təşviqinə, Konfutsi institutlarının inkişafına dəstək verilməsinə ehtiyac olduğu qeyd edilib.
Sonra seminar iştirakçılarına ADU-nun Konfutsi İnstitutu tərəfindən Çin dilində nəşr olunmuş “İlham Əliyev - iki qədim xalqın dostluğunun müasir davamçısı (2003-2023)” və “Heydər Əliyev və Çin” kitabları hədiyyə edilib.
Konfrans çərçivəsində ADU-nun nümayəndə heyəti Çin dilinin tədrisi və testində yüksək texnologiyaların tətbiqi və Çin dilinin tədrisi sahəsində innovativ təcrübələrə həsr olunmuş sərgi ilə tanış olub.
Səfər zamanı ADU-nun nümayəndə heyəti ilə ÇXR-in Huçjou Universitetinin rəhbərliyi arasında görüş keçirilib. Görüşdə yeni elm və təhsil layihələri əsasında əməkdaşlığın genişləndirilməsi məsələləri müzakirə olunub. İkitərəfli təhsil və tələbə mübadiləsi proqramlarının həyata keçirilməsində iki ölkənin dil və mədəniyyətinin öyrənilməsinin əhəmiyyəti vurğulanıb.
