Danimarkanın Kopenhagen şəhərində sifarişli qətl hazırlığında şübhəli bilinən 16 yaşlı isveçli yeniyetməyə məhkəmə hökmü oxunub.
Yenicag.az yerli DR nəşrinə istinadla xəbər verir ki, Kopenhagen Dairə Məhkəməsi 16 yaşlı gənci qətlə hazırlıqda təqsirli bilib və onu 5 il 6 ay müddətinə azadlıqdan məhrum edib. Yeniyetmə aprel ayında Kopenhagendəki əsas dəmir yolu stansiyasının yaxınlığında saxlanılıb. Onun messencerdəki yazışmaları istintaq üçün əsas sübutlardan biri olub.
Məhkəmə cəzanın sərtliyini onunla əsaslandırıb ki, yeniyetmənin hərəkətləri kortəbii deyil, tam şüurlu şəkildə planlaşdırılıb. O, sifarişçilərlə davamlı əlaqə saxlayır və cinayəti həyata keçirmək üçün yaşadığı yerdən min kilometr uzaqda yerləşən Kopenhagendə hərəkət edirmiş. Məhkəmə zamanı təqsirkar gənc yolda qərarından peşman olduğunu sübut etməyə çalışsa da, bu arqument qəbul edilməyib. Polisə vəziyyəti barədə məlumat verməməsi onun müdafiəsini zəiflətdi.
Portal yazır ki, bu hadisə son dövrlərdə Kopenhagendə baş verən oxşar məhkəmə işlərinin bir hissəsidir. 2024-cü ilin yayında İsveçdən olan yeniyetmələrin Danimarkada müxtəlif cinayət vəzifələri üçün cinayətkar təşkilatlar tərəfindən işə cəlb edilməsi sistemli problemə çevrilib. Belə ki, oktyabrın əvvəlində Kopenhagendəki İsrail səfirliyi yaxınlığında baş verən partlayışlarda da İsveçdən olan uşaqların iştirak etdiyi müəyyən edilib. Bundan əlavə, İspaniya polisi bu yaxınlarda isveçli və danimarkalı yeniyetmələri cinayət işlərinə cəlb edən bir dəstəni saxlayıb.
