Argentinalı futbol mütəxəssisi Xavyer Maskerano MSL təmsilçisi “İnter Mayami”nin baş məşqçisi vəzifəsinə təyin edilib.
Arena.az bu barədə Amerika Birləşmiş Ştatları (ABŞ) klubunun rəsmi saytına istinadən məlumat verir.
Maskerano “vağlar”ın sükanı arxasında həmyerlisi Xerardo “Tata” Martinonu əvəz edib. Hansı ki, təcrübəli mütəxəssis şəxsi səbəblərə görə “İnter Mayami”dən ayrılmağa qərar verib.
Xerardo Martino 2023-cü ilin iyul ayından “İnter Mayami”yə rəhbərlik edirdi. 62 yaşlı mütəxəssis bu müddət ərzində MLS təmsilçisini 67 oyuna çıxarıb. Mayami klubu bu görüşlərdə 38 qələbə qazanıb, 13 heç-heçə edib, 16 məğlubiyyətə üzülüb.
Argentinalı mütəxəssis daha öncə Meksika, Argentina, Paraqvay yığmalarında, “Atlanta Yunayted”, “Barselona”, “Nyuels Old Boyz, “Libertad”, “Kolon”, “Serro Porteno”, “İnstituto”, “Platense” kimi klublarda da baş məşqçi kimi çalışıb.
Martinonu əvəz etmiş Maskerano ilə “İnter Mayami” arasındakı müqavilənin müddəti MLS-in 2027-ci il mövsümünün sonuna qədər nəzərdə tutulub. Maskerano buna qədər Argentinanın gənclərdən ibarət komandasını (U-20) çalışdırırdı. Maskeranonun Argentina Futbol Assosasiyası (AFA) ilə müaviləsinin müddəti cari ilin dekabr ayının sonuna qədər nəzərdə tutulub. “Barselona”nın keçmiş futbolçusunun iş üçün gərək olan sənədləri aldıqdan sonra “İnter Mayami”də fəaliyyətə başlayacağı vurğulanır. Güman ki, Maskerano bu sənədləri cari ilin bitməsi ilə əldə edəcək və müqavilənin rəsmiyyəti təsdiqləndikdən sonra “İnter Mayami”nin sükanı arxasında məşqçilk fəaliyyətini davam etdirəcək.
Xatırladaq ki, hazırda “İnter Mayami”nin heyətində, Maskerano hələ futbolçu ikən onunla birlikdə çıxış etmiş Lionel Messi, Serxio Buskets, Luis Suares, Jordi Alba olmaqla, “Barselona”nın keçmiş futbolçuları yer alıblar.
