Yazar Zümrüd Yağmur (Abıyeva Zümrüd İsrafil qızı) barəsində məhkəməyə axtarış qərarı çıxarıb.

Reyting.az Pravda.az-a istinadla xəbər verir ki, bu barədə qərar Abşeron Rayon Məhkəməsində elan olunub.

Belə ki, xüsusi ittihamçı Ağayeva Sürəyya İsrafil qızı Abıyeva Zümrüd İsrafil qızına qarşı xüsusi ittiham qaydasında Cinayət Məcəlləsinin 147.2 (böhtan) və 148-ci (təhqir) maddələri ilə məhkəməyə müraciət edib. Abşeron Rayon Məhkəməsi şikayəti icraata qəbul edib və Zümrüd Abıyeva barəsində başqa yerə getməmək haqqında qətimkan tədbiri seçilib. Lakin o, 05 noyabr 2024-cü il tarixə, saat 16:00-a tarixə təyin olunmuş məhkəmə baxış iclası barədə lazımi qaydada xəbərdar olunmasına baxmayaraq məhkəmə iclasına gəlməyib.

Sonra barəsində xüsusi ittiham qaydasında şikayət verilən təqsirləndirilən şəxs Zümrüd Abıyevanın növbəti məhkəmə baxış iclasına məcburi qaydada gətirilməsi barədə qərar qəbul edilib. Qərarın icrası Abşeron Rayon Polis İdarəsinə həvalə olunub. Lakin onun ölkə xaricində olduğu üçün barəsində axtarış qərarı çıxarılıb. Buna görə işin icraatı dayandırılıb.

Qeyd edək ki, Zümrüd Abıyeva barəsində xüsusi ittiham qaydasında məhkəməyə müraciət edən Sürəyya Ağayeva onun qohumudur. Xüsusi ittihamçının oğlu Əsgər Ağazadə Zümrüd Abıyevanın qızını zorlamaqda ittiham olunaraq 5 il müddətinə azadlıqdan məhrum edilib.

Sürəyya Ağayeva xüsusi ittihamda qeyd edib ki, Zümrüd Abıyeva ona şər-böhtan atıb, şərəf və ləyaqətini alçaldıb.