“Çox keyfiyyətli bir komandaya qarşı oynayacağıq. Bizim üçün çox vacib matçdır. Pis hazırlaşmamışıq. Çalışacağıq ki, diqqətli olaq. Azarkeşlərimizi sevindirməyi çox istəyirik”.
QOL.az xəbər verir ki, bu sözləri “Qarabağ”ın baş məşqçisi Qurban Qurbanov Avropa Liqasının Liqa mərhələsinin 5-ci turunda sabah “Lion”la (Fransa) keçiriləcək oyun üçün təşkil edilən mətbuat konfransında deyib.
- Marko Veşoviç və Mateus Silvanın durumu necədir? Sabah ilk dəqiqələrdən oynaya bilərlər?
- Ümumən pis deyil. Hazırlıqları yaxşı səviyyədədir. Sabah tam qəti qərar verəcəyik ki, əsas heyətdə olacaqlar, yoxsa yox.
- Yəqin ki, “Lion”un heyəti ilə tanışsınız. Klub isə hazırda maddi cəhətdən əziyyət çəkir. Sizcə, bu durumda qələbə qazanmaq şansınız necədir?
- Bəli, oyunlarına da baxmışıq, təhlil etmişik. Sabah komandamızda kimin meydanda olması bizim üçün bəllidir. Sadəcə 1-2 sual doğuran mövqe var. Rəqibdə böhran oldu-olmadı biz hazırlaşırıq. Bu söz-söhbətlər şaiyədir. İstənilən klubda belə söhbətlər gəzir. Böyük klublar belə durumda 1-2 futbolçunu satmaqla vəziyyətdən çıxır. Belə söhbətlərə nə biz fikir verməliyik, nə də siz. Çünki bəzən bu fikirlər hansısa nəticəyə kölgə sala bilər. Bunlar sadəcə söz-söhbətlərdir.
- “Lion”u hansı xüsusi keyfiyyətlərlə təəccübləndirə bilərsiniz?
- Əvvəl də dedim ki, çox keyifiyyətli komanda ilə qarşılaşacağıq. Rəqib haqda çox danışmaq istəmirəm. Bizim isə ən böyük gücümüz kollektiv oyuna üstünlük verməkdir. Bu gün “Lion” bizdən bütün cəhətdən üstün görünür. Çünki daha böyük çempionatda çıxış edir. Biz də kifayət qədər avrokubok təcrübəsi yığmışıq. Çalışacağıq ki, kollektiv şəkildə yaxşı mübarizə aparaq.
