Ukrayna Müdafiə Nazirliyi “Oncilla-Şturm” zirehli nəqliyyat vasitəsini kodlaşdıraraq istifadəyə verib.
Bu barədə “Poliqon” Ukrayna Müdafiə Nazirliyinə istinadən xəbər verib.
Bildirilib ki, bir neçə modifikasiyada istehsal oluna bilən zirehli nəqliyyat vasitəsi müxtəlif döyüş tapşırıqlarını yerinə yetirmək üçün nəzərdə tutulub.
“Oncilla-Şturm” zirehli maşını güclü turbodizel mühərrikə, avtomatik transmissiyaya, kondisionerə, təkərlərin avtomatik şişirdilməsi və yanğınsöndürmə sistemlərinə sahibdir. O, içəridəki şəxsi heyəti və daşınan personalı təhlükələrdən qorumaq üçün atəşə və partlayışa tab gətirə bilən zirehlə təchiz olunub.
Zirehli maşının ekipajı üç nəfər və daşıya bildiyi personal sayı altı nəfərdir. Zirehli nəqliyyat vasitəsinin tam dolu yanacaq çəni ilə hərəkət mənzili 700 km-dən çox təşkil edir. Onun silahlanmasına iri çaplı pulemyotla təchiz edilmiş uzaqdan idarə olunan döyüş modulu daxildir.
