Lüks brendlər 2022-ci ildən bəri təxminən 50 milyon müştərisini itirib. Bu, onların müştəri bazasının 10 faizdən çoxunu təşkil edir.
Musavat.com xəbər verir ki, məlumatı "The Wall Street Journal" (WSJ) beynəlxalq konsaltinq şirkəti "Bain & Company"nin hesablamalarına istinadən yayıb.
Bildirilir ki, tarixdə ilk dəfədir ki, bu sektorda alıcıların sayının azalması qeydə alınır. Son üç onillikdə brendlər satışları artırmaq üçün yeni orta təbəqədən olan istehlakçıları cəlb etməyə çalışsalar da, qiymətlərin artması bu tendensiyanı pozub. WSJ qeyd edir ki, pandemiyanın başlanmasından bəri lüks malların orta qiyməti əhəmiyyətli dərəcədə artıb.
Lüks brendlər nəinki daha az müştəriyə xidmət göstərməyə başlayıb, həm də satış həcmini əhəmiyyətli dərəcədə azaldıb. Analitiklər qeyd edirlər ki, lüks sənayedə satışlar 2022-ci illə müqayisədə 2024-cü ildə 20-25 faiz azala bilər. Xüsusilə, çanta və ayaqqabı kimi malların satışı üçdə bir qədər azala bilər.
Qəzet yazır ki, bu vəziyyət fonunda istehlakçılar getdikcə daha sərfəli brendlərə və ikinci əl mallara maraq göstərirlər. WSJ-nin məlumatına görə, 2019-cu ildən bəri təkrar satış biznesi əsas dəbdəbəli bazardan üç dəfə daha sürətlə böyüyüb.
Musavat.com
