Türkiyənin Samsun vilayətinin Çarşamba rayonunda yerləşən Kumköy ibtidai məktəbində layihələri ilə 2014-cü ildə “Varkey Gems” fondu tərəfindən dünyanın ən yaxşı 50 müəllimi arasına daxil edilən Dilek Livaneli "She Inspires Awards 2024" müsabiqəsində də mükafata layiq görülüb. O, Avropada yaşayan türk uşaqlarına yönəlik hazırladığı Türkcə Ana Dil Təhsil Proqramı çərçivəsində İngiltərədə UNESCO-ya bağlı Beynəlxalq London Məktəbində müəllimlik fəaliyyətinə davam edir.
“She Inspires Foundation” tərəfindən təşkil edilən və 16 ölkədən 10 min müəllimin iştirak etdiyi "She Inspires Awards 2024" müsabiqəsində Livaneli əvvəlcə 16 qadın finalçısından biri olub. Yekun olaraq isə birinci seçilib. Dilek Livaneli Böyük Britaniyada “Ömür boyu uğur mükafatı” alıb.
Dilek Livaneli hər təbəqədən olan qadının cəsarət, zəfər, nəzakət, şəfqət, yenilik, bacarıq və uğurun qeyri-adi nümunələrini sərgilədiyi mükafat gecəsində Türkiyəni təmsil etməkdən qürur duyduğunu bildirib.
