“Yuventus”un baş məşqçisi Tyaqo Motta Çempionlar Liqasının Liqa mərhələsinin 5-ci turunun “Aston Villa” ilə səfər oyununu (0:0) şərh edib.
Arena.az UEFA-nın rəsmi saytının “Amazon Prime Video Italia” dərgisinə istinadı əsasında, braziliyaəsilli italiyalı mütəxəssisin bu barədə fikrini təqdim edir:
“Komanda möhkəm və tarazlı oynamağa davam edir. “Aston Villa” sürətli əks-hücumlarda təhlükəlidir və uzun aşırma ötürmələrlə hücumçuları axtarırdı, amma biz mütəmadi olaraq onlara bunu etməyə imkan vermirdik. Açığı, biz özümüz də çox fürsət yaratmadıq, amma bu, “Aston Villa”ya ümid etdikləri fürsəti verməmək üçün edildi. Bu, daha bir yaxşı oyun, dəyərli xal idi və biz ələmə mərələsinə vəsiqə üçün mübarizəmizi davam etdiririk.
Biz hər zaman qalib gəlmək istəyirik. Növbəti mərhələyə yüksəlməyi təmin etmək üçün cəmi üç oyun qalıb. Bu, mühüm məqamdır. Bugünkü kimi, hər oyunda bacardığımızı etməliyik. Fikirlərlə meydana çıxmaq və qalib gəlməyə çalışmaq gərəkdir”, deyə Motta vurğulayıb.
5 turdan sonra “Aston Villa” Çempionlar Liqasının Liqa mərhələsinin yarış cədvəlində 10 xalla 9-cu pillədədir. “Yuventus” isə 8 xalla 19-cu pillədə qərarlaşıb.
