Azərbaycanın Baş naziri Əli Əsədov gürcü həmkarı İrakli Kobaxidzeni yenidən Gürcüstanın baş naziri təyin olunması münasibətilə təbrik edib.
Teleqraf.com xəbər verir ki, bu barədə Gürcüstan hökumətinin administrasiyası məlumat yayıb.
Ə.Əsədov təbrik məktubunda Azərbaycan və Gürcüstan arasında strateji tərəfdaşlığı və ikitərəfli əməkdaşlığın dinamikasını vurğulayıb.
“Dostumuz və etibarlı tərəfdaşımız Gürcüstanla münasibətlərin artan dinamikası məmnunluq doğurur. Bizim ölkələri bir-biri ilə tarixi köklər bağlayır, ikitərəfli və çoxtərəfli formatlarda qarşılıqlı faydalı istiqamətlər üzrə məhsuldar əməkdaşlıq var. Biz gələcəkdə də Azərbaycan və Gürcüstan arasında dostluğun, qarşılıqlı hörmət və dəstəyə əsaslanan münasibətlərin, strateji tərəfdaşlığın genişlənməsinə töhfə verməyə hazır olduğumuzu bildiririk. Fəaliyyətinizdə sizə cansağlığı, xoşbəxtlik və qardaş gürcü xalqının rifahı naminə uğurlar arzulayıram”, - Azərbaycanın hökumət başçısının təbrikində deyilir.
