Bu gün futbol üzrə Azərbaycan çempionatında (Premyer Liqa) 2024/2025-ci illər mövsümünün 15-ci turuna start veriləcək.
Arena.az xəbər verir ki, ilk oyun günündə iki qarşılaşma baş tutacaq.
Turun açılış oyununda “Araz-Naxçıvan” və “Turan Tovuz” komandaları üz-üzə gələcəklər. Mərdəkanda baş tutacaq qarşılaşmaya maraq böyükdür. Məsələ burasındadır ki, mövsümün uğurlu komandaları həm də turnir cədvəlində qonşu pillələrdə qərarlaşıblar. Son dörd oyunundan maksimum nəticə ilə ayrılmış “Araz-Naxçıvan” 33 xalla 2-ci sıradadır və lider “Qarabağ”dan cəmi 1 xal geri qalır. Son üç oyununda ardıcıl heç-heçələrlə kifayətlənən “Turan Tovuz” isə 27 xalla üçüncüdür.
Günün digər oyunu “Sabah”la “Səbail” arasında keçiriləcək. Paytaxt təmsilçiləri cari mövsümdə heç də uğurlu təsir bağışlamırlar. Təsadüfi deyil ki, bu üzdən artıq həm “dənizçilər”, həm də “bayquşlar” baş məşqçi dəyişmək məcburiyyətində qalıblar. Cavid Hüseynov “Səbail”in sükanı arxasında artıq debüt matçını da keçirib və ötən tur “Qarabağ”a böyük hesabla məğlubiyyətin şahidi olub. “Sabah”da isə xorvatiyalı Krunoslav Renduliçi rusiyalı Vasili Berezutski əvəz edib. Bu üzdən də “Səbail”lə oyun Berezutskinin yeni komandasında debütü ilə əlamətdar olacaq.
Qeyd edək ki, “Sabah” hazırda 19 xalla 5-ci, “Səbail” 8 xalla 9-cu pillədə qərarlaşıb.
Premyer Liqa
15-ci tur
29 noyabr
16:00. “Araz-Naxçıvan” – “Turan Tovuz”
Hakimlər: Cavid Cəlilov, Kamran Bayramov, Müslüm Əliyev, Nicat İsmayıllı.
VAR: Rauf Cabbarov.
AVAR: Eyyub İbrahimov.
Hakim-inspektor: İmanxan Sultani.
Mərdəkan. “Dalğa Arena”.
19:00. “Sabah” – “Səbail”
Hakimlər: Rəvan Həmzəzadə, Cəmil Quliyev, Şirmamed Mamedov, Əli Əliyev.
VAR: Rauf Allahverdiyev.
AVAR: Rəhman İmami.
Hakim-inspektor: Ramil Diniyev.
“Masazır Arena”.
30 noyabr
14:30. “Şamaxı” – “Kəpəz”
Hakimlər: İnqilab Məmmədov, Zöhrab Abbasov, Rahil Ramazanov, Əkbər Əhmədov.
VAR: Tural Qurbanov.
AVAR: Teymur Teymurov.
Hakim-inspektor: Əmrah İbrahimov.
Şamaxı şəhər stadionu.
17:00. “Zirə” – “Sumqayıt”
Hakimlər: Rəşad Əhmədov, Vüsal Məmmədov, Rəhman İmami, Elvin Bayramov.
VAR: Nicat İsmayıllı.
AVAR: Asiman Əzizli.
Hakim-inspektor: Ceyhun Haşımov.
Zirə İdman Kompleksinin stadionu.
1 dekabr
19:00. “Neftçi” – “Qarabağ”
Hakimlər: Əliyar Ağayev, Zeynal Zeynalov, Akif Əmirəli, Elçin Məsiyev.
VAR: Kamal Umudlu.
AVAR: Elşad Abdullayev.
Hakim-inspektor: Asim Xudiyev.
Bakı. “Neftçi Arena”.
