Almaniya “arzuolunmaz körpə” qutuları (babyklappe) olan bir ölkədir.
İndex.az xəbər verir ki, bu qutular arzuolunmaz və ya baxıla bilməyən körpələri təhlükəsiz şəkildə tərk etmək üçün nəzərdə tutulub.
Qəribə görünə bilər, amma əslində bunun arxasında çox humanitar məqsəd dayanır: körpələrin küçələrə atılmasının və buna görə də həyati təhlükəsi olan vəziyyətlərin yaşanmasının qarşısını almaq.
Qutular xəstəxanaların və ya sosial xidmət binalarının girişinə yaxın yerləşdirilir. Ana və ya ata körpəni qutuya qoyur və qutunu bağladıqdan sonra bir neçə dəqiqə ərzində həyəcan siqnalı işə düşür. Lakin bu həyəcan siqnalı yalnız içəridəki tibb işçilərinə məlumat verir, kənardan heç kim bunu hiss etmir, ona görə də tam məxfidir. Heyət dərhal körpəni götürüb ilkin yoxlamalar aparır, daha sonra isə himayədar ailə və ya övladlığa götürmə prosesi kimi sosial xidmətlər çərçivəsində körpə təmin edilir.
Əgər ana qutuya öz məlumatını qoyubsa və körpəni geri almaq istəyirsə, proses daha asan olur.
Körpənin yerləşdiyi müəssisə ilə əlaqə saxlamalı və vəziyyəti izah etməli və şəxsiyyətini təsdiq etməlidir. Yəni dövlət ilk növbədə körpənin təhlükəsizliyini düşünür və müxtəlif hüquqi prosedurlar tətbiq edilir.
Körpəni geri götürmək istəyən ana qutuda öz məlumatını qoymayıbsa, körpənin olduğu müəssisə və körpəni izləyən səlahiyyətlilərlə əlaqə saxlamaq lazımdır. Əgər məlumatını qoyub, lakin uşaqla bir daha əlaqə saxlamayıbsa, uşağın 16 yaşı tamam olduqdan sonra bioloji ailəsi haqqında məlumat almaq hüququ var və istəsə, onu tərk etmiş anasının məlumatlarını əldə edə bilər.
Bu yolla “arzuolunmaz körpələrin” küçəyə, zibilliyə və ya təhlükəli mühitə atılmasının qarşısı alınır.
