“Bavariya”nın qapıçısı Manuel Noyer karyerasında ilk dəfə qırmızı vərəqə alıb. Bu, Almaniya kubokunun 1/8 finalında “Bayer Leverkuzen”lə matçın 17-ci dəqiqəsində reallaşıb. Meydana çıxdığı 800-cü matçında 38 yaşlı qolkiperə birbaşa qırmızı vərəqə göstərilib.
Həftənin ÇAŞQINI
Daha öncə kürsüdən enərkən boşluğa salam verməsi, yolunu itirməsi, adları səhv salması ilə gündəmə gələn ABŞ Prezidenti Co Bayden bu dəfə ölkə ilə şəhəri qarışdırıb. Bayden Afrika ölkəsi Anqolanı “canlı şəhər” adlandırıb. Bu barədə o, Anqola Prezidenti Juan Lourenso ilə görüşündə danışıb. “Bilirsiniz, Anqola canlı bir şəhərdir! Mmm, şəhər deyil. Bilirəm ki, bu şəhər Anqola deyil, amma Anqola canlı bir şəhərdir!”, - Bayden deyib.
Həftənin İSTEFASI
ABŞ-nin Azərbaycandakı səfiri Mark Libbi diplomatik xidmətdən istefa verib. Bu barədə ABŞ-nin Bakıdakı Səfirliyinin feysbuk hesabında səfirin adından bəyanat yayılıb. Onun səhhəti ilə bağlı problemlərə görə istefa verdiyi qeyd olunub. “ABŞ diplomatik xidmətindən istefamı ürək ağrısı ilə bəyan edirəm. 2023-cü ildə ABŞ Senatı qarşısında dinləməmdə qeyd etdiyim sağlamlıq qayğıları, təəssüf ki, davam edib. Son test nəticələri göstərir ki, tamamilə öz sağlamlığım üzərində diqqət cəmləmək üçün evə qayıtmaq vaxtıdır", - səfir deyib.
Həftənin TƏHDİDİ
ABŞ-nin yeni seçilmiş prezidenti Donald Tramp andiçmə mərasiminə qədər İsrail-Fələstin münaqişəsində atəşkəs razılaşması əldə olunmaması və girovların geri qaytarılmaması halında Qəzza zolağında girovların saxlanmasına görə məsuliyyət daşıyanları çox ağır cəzalandıracağı ilə hədələyib. O, bu barədə “Truth Social” hesabında yazıb.
Həftənin ƏN YAXŞILARI
Nüfuzlu “Goal” nəşri XXI əsrdə dünyanın ən yaxşı futbol məşqçilərindən ibarət siyahını tərtib edib. Birinci yeri hazırda “Mançester Siti”nin baş məşqçisi olan Xosep Qvardiola (sabiq klubları – “Barselona” və “Bavariya”) tutur. “Real Madrid”in çalışdırıcısı Karlo Ançelotti (“Milan”, “Çelsi”, “Bavariya”) ikinci sırada yer alıb. “İlk üçlüy”ü “Mançester Yunayted” komandasının sabiq baş məşqçisi Aleks Ferqyuson tamamlayır.
Həftənin SƏFƏRİ
Almaniya kansleri Olaf Şolts Kiyevdə Ukrayna Prezidenti Volodimir Zelenski ilə görüşüb. Ukrayna lideri bu haqda öz teleqram kanalında məlumat verib. O, Almaniya hökumətinin başçısına PUA-ları göstərib. Qeyd edək ki, O.Şolts sonuncu dəfə 2.5 il bundan əvvəl Ukraynaya səfər edib.
