Vaxtilə Azərbaycanda da çalışmış ispaniyalı futbol mütəxəssisi Ruben Selles İngiltərənin “Hall Siti” komandasına baş məşqçi təyin olunub.
Arena.az xəbər verir ki, bu barədə Çempionşip təmsilçisi rəsmi saytı vasitəsilə məlumat yayıb.
41 yaşlı mütəxəssislə 2027-ci ilin yayına qədər nəzərdə tutulmuş müqavilə imzalanıb. O, sözügedən komandanın sükanı arxasında Tim Uolteri əvəz edib. “Hall Siti” mövsümə məhz Tim Uolterin rəhbərliyi altında başlamışdı. Amma komanda onun dönəmində heç də uğurlu çıxış etməyib. “Hall Siti” 49 yaşlı almaniyalı mütəxəssisin rəhbərliyi altında 18 oyun keçirib və cəmi 3 qələbə qazanıb. Qalan oyunlarda 6 heç-heçə və 9 məğlubiyyət qeydə alınıb. “Hall Siti” hazırda 18 oyuna topladığı 15 xalla 24 iştirakçı arasında 22-ci pillədə qərarlaşıb.
Ruben Selles 2023-cü ilin iyul ayından bəri “Ridinq”ə rəhbərlik edirdi. O, məhz “Hall Siti”dən aldığı təklifə görə dekabrın 5-də “Ridinq”dən ayrılmağa qərar verib. 41 yaşlı mütəxəssis bu komandanı 78 oyuna çıxarıb, 35 qələbə qazanıb, 14 heç-heçə edib, 29 məğlubiyyətə üzülüb.
Selles “Ridinq”dən öncə İngiltərədə xeyli müddət “Sauthempton”un əvəzedici və əsas komandasını çalışdırıb. O, 2022-ci ilin iyul ayından 2023-cü ilin iyununa qədər məhz “Sauthempton”da fəaliyyət göstərib.
Ruben Selles daha əvvəl Azərbaycanda da işləyib. O, 2012-2014-cü illərdə “Neftçi”də, 2015-2017-ci illərdə isə “Qarabağ”da baş məşqçinin köməkçisi vəzifəsini yerinə yetirib.
Sonda onu da xatırladaq ki, “Hall Siti” klubunun sahibi türkiyəli iş adamı Acun Ilıcalıdır.
