Qlobal reklam bazarının həcmi bu il ilk dəfə olaraq 1 trilyon dolları keçəcək. Bazarın 2025-ci ildə 7,7% artaraq 1,1 trilyon dollara çatacağı nəzərdə tutulur.
Marja.az xəbər verir ki, WPP-yə məxsus media agentliyi GroupM, 2024-cü ildə qlobal reklam gəlirlərinin 9,5 faiz artacağını proqnozlaşdırır. Bu göstərici ilin yarısında verilən proqnozdan daha yüksəkdir.
GroupM 2025-ci ildə reklam bazarında 7,7 faiz artım tempini proqnozlaşdırır. Bununla belə, bu artımın ABŞ texnologiya sektorunda rəqəmsal reklam satıcılarına böyük fayda gətirəcəyi, reklam agentlikləri kimi marketinq xidməti təminatçılarının isə daha az fayda görəcəyi bildirilir.
Rəqəmsal reklamın hökmranlığı
Agentliyin Hesabatına görə, rəqəmsal reklam 2024-cü ilin sonuna qədər qlobal reklam gəlirlərinin 73 faizini təşkil edəcək. Buna rəqəmsal qəzet və jurnallardan əldə edilən gəlirlər daxil edildikdə bu nisbət 82 faizə yüksəlir. Rəqəmsal reklam 2024-cü ildə 12,4 faiz, 2025-ci ildə isə 10 faiz artacaq.
Ənənəvi reklam kanalları bu dəyişiklikdən mənfi təsirlənir. Televiziya, çap mediası və radio kimi sahələrdə gəlir itkiləri var. Çap reklamlarının gəlirləri 2024-cü ildə 4,5 faiz, 2025-ci ildə isə 3 faiz azalacaq. Audio medianın gəlirləri sabit qalacaq, televiziya 2024-2029-cu illərdə cəmi 2,4 faiz artım göstərəcək.
ABŞ 2025-ci ildə 379 milyard dollar gəlirlə dünyanın ən böyük reklam bazarı olmağa davam edəcək. Bununla belə, artan borclanma xərcləri və pərakəndə sektordan daha ehtiyatlı artım proqnozları bu bazarı məhdudlaşdıra bilər.
Çində 2024-cü ildə reklam gəlirlərinin 13,5 faiz artaraq 204,5 milyard dollara çatacağı gözlənilir. Əgər Çin hökumətinin istehlakçı inamını artırmaq təşəbbüsləri uğurlu olarsa, bu bazarda daha güclü artım müşahidə olunacaq. Avropanın ən böyük reklam bazarı olan Böyük Britaniya 2024-cü ildə 53,2 milyard dollara çatacaq və bu il 8,3% artacaq.
Gələcəyin reklamı: Süni intellekt və avtomatlaşdırma
GroupM, süni intellekt və avtomatlaşdırmanın reklam sənayesində innovasiyaları artıraraq böyüməyə töhfə verəcəyini bildirib. Hesabatda pandemiya sonrası və maliyyə böhranı dövründə sıfıra yaxın faiz dərəcələri ilə dəstəklənən böyümə mühitinin sona çatdığı, lakin texnologiyanın təmin etdiyi yeniliklərin bu boşluğu doldura biləcəyi qeyd edilib.
Rəqəmsallaşma texnologiya nəhəngləri Google, Meta və Amazon kimi şirkətlərin qlobal reklam bazarında hökmranlığını gücləndirir. Texnologiya sektorunun hakim olduğu bu bazarda Google, Meta, ByteDance, Amazon və Alibaba ümumi gəlirin yarıdan çoxunu qazanacaqlar.
