Gürcüstanın baş naziri İrakli Kobaxidze bildirib ki, Daxili İşlər Nazirliyinə radikal müxalifətin resurslarını zərərsizləşdirmək üçün beş gün vaxt lazım olub. Bununla da baş nazir iddia edir ki, hakimiyyət Ukrayna Maydanının təkrarlanmasının qarşısını ala bilib.
HİT.az bu barədə "Tabula" portalına istinadən xəbər verir.
"Müharibə partiyası "seçkilərdə qalib gəlməyi planlaşdırdığı müharibənin simulyasiyasını təşkil etdi, biz Rustaveli prospektində onun kiçik simulyasiyasını gördük. Bununla belə, gördünüz ki, Daxili İşlər Nazirliyinə radikal müxalifətin resurslarını zərərsizləşdirmək üçün düz beş gün vaxt lazım idi", deyə Kobaxidze hökumətin iclasında bildirib.
Gürcüstan Daxili İşlər Nazirliyinin məlumatına görə, noyabrın 28-dən bu yana keçirilən etiraz aksiyalarında 400 nəfər saxlanılıb. Bu müddət ərzində 150 polis əməkdaşı yaralanıb. “Gürcü Arzusu”nun Avropa İttifaqına daxil olmaq üzrə danışıqların başlanmasını 2028-ci ilə qədər dayandırmaq qərarına görə etirazlar yenidən başlayıb. Etiraz aksiyaları etirazçılarla təhlükəsizlik qüvvələri arasında toqquşmalarla müşayiət olunub: birincilər pirotexniki vasitələrdən, onlara qarşı isə gözyaşardıcı qazdan və su şırnaqlarından istifadə ediblər.
Etirazlardan bir həftə sonra müxalifət partiyalarının bir neçə lideri və fəallarına qarşı cinayət işi açılıb. Digərləri arasında Dəyişiklik Koalisiyasının lideri Nika Qvaramiya da saxlanılıb. Müxalifət partiyalarının ofislərində, eləcə də bir sıra qeyri-hökumət təşkilatlarının rəhbərlərinin mənzillərində axtarış aparılıb. Dünən, dekabrın 8-də axşam saatlarında Tbilisidə ardıcıl on birinci etiraz aksiyası keçirilib.
Samir
