Cənubi Azərbaycanın ən məşhur futbol komandası olan “Traktor” İran çempionatının 2024/2025 mövsümündə növbəti matçına çıxıb.
Arena.az xəbər verir ki, Təbriz klubu 8-ci turdan təxirə salınmış oyunda “Gol Gohar” ilə qarşılaşıb.
İspaniyalı Pako Xemesin çalışdırdığı kollektiv bu rəqiblə səfərdə üz-üzə gəlib. “Traktorçular” meydandan inamlı qələbə ilə ayrılıblar – 2:0. Halbuki, qonaqlar 45+2-ci dəqiqədən etibarən azlıqda oynamaq məcburiyyətində qalıblar. İqor Postoniski birbaşa qırmızı vərəqə ilə meydandan qovulub. Buna baxmayaraq, təbrizlilər 68-ci dəqiqədə Tomislav Ştrkalın vurduğu qol sayəsində hesabı açıblar. 76-cı dəqiqədə isə Mahdi Haşemnecad komandasının qələbəsini rəsmiləşdirib.
“Traktor” hazırda 11 oyuna topladığı 25 xalla 16 iştirakçı arasında birinci pillədə qərarlaşıb. Təbriz klubu çempionatdakı növbəti matçını dekabrın 16-da səfərdə “Malavan” komandasına qarşı keçirəcək.
