“Əslində Cəfər Cabbarlının Ev Muzeyi əvvəlki ünvanda fəaliyyətdədir. Bircə ekspozisiya zalımız hazır deyil”.
Bunu Teleqraf.com-a açıqlamasında Cəfər Cabbarlının Bakıda yerləşən Ev Muzeyinin direktoru Qəmər Seyfəddinqızı deyib.
O bildirib ki, hazırda ev muzeyinin bəzi eksponatları müvəqqəti olaraq Teatr Muzeyində nümayiş olunur: “Teatr Muzeyində böyük bir zalda Cabbarlının həyat və yaradıcılığını əks etdirən eksponatları sərgilənir. Onların içərisində Cəfər Cabbarlı Ev Muzeyinin eksponatları da yer alıb. Muzeyin fəaliyyəti həm Mədəniyyət Nazirliyinin, həm də Bakı Şəhər Mədəniyyət Baş İdarəsinin tabeleyində həyata keçirilir. Azərbaycanda muzeylər bir-birinin ardınca təmir olunub, inkişaf etdirilir. Ümid edirəm ki, bizim muzeyimizdə də bu işlər həyata keçiriləcək”.
Xızıda yerləşən Cəfər Cabbarlının ev muzeyi ilə də sıx əlaqələri olduğunu bildirən Qəmər Seyfəddinqızı qeyd edib ki, hər il ənənəvi olaraq orada “Xızıda Cəfər Cabbarlı günü” keçirilir.
“Bu il də ora gedib Cabbarlını yad etdik. Həmçinin orada tanınmış elm, mədəniyyət və incəsənət xadimlərinin, Xızı ictimaiyyətinin də iştirakı ilə ”Cəfər Cabbarlı - ədəbiyyatımızın böyük sənət fədaisi” adlı tədbir keçirildi. Ümumiyyətlə, qeyd edim ki, Cabbarlının 125 illiyi ilə bağlı xeyli tədbirlərimiz olub və bu silsilə davam etdirilir. Çalışırıq ki, Cabbarlı ilə bağlı tədbirlər həm burada, həm də orada keçirilsin”.
