Azərbaycan Dövlət İqtisad Universitetinin (UNEC) rektoru Ədalət Muradov UNEC məzunları və "Yüksəliş" müsabiqəsinin qalibləri ilə görüş keçirib. Görüşdə universitet təhsili və gələcək inkişaf perspektivləri ilə bağlı açıq və səmimi müzakirələr aparılıb.
QHT.az xəbər verir ki, rektor çıxışı zamanı Azərbaycan Respublikasının Prezidenti İlham Əliyevin "Azərbaycan Dövlət İqtisad Universiteti dünya səviyyəli universitetə çevrilməlidir!" tapşırığının icrasına dair UNEC-də həyata keçirilən layihələr və görülən işlər haqqında məlumat verib. Eyni zamanda, iştirakçıların suallarını cavablandırıb. Görüşdə iştirak edən idman və gənclər nazirinin müavini Fərhad Hacıyev və "Yüksəliş" müsabiqəsinin qalibləri rektora göstərilən diqqət və yaradılan şərait üçün minnətdarlıqlarını ifadə ediblər.
Ədalət Muradov maraqlı müzakirələr və UNEC-in inkişafına dair töhfələri üçün Fərhad müəllimə və iştirakçılara təşəkkür edib. Bu cür tədbirlər UNEC-in dünya səviyyəli bir təhsil ocağına çevrilməsi yolunda əhəmiyyətli addımlardan biridir.
