Bakı, 11 dekabr, AZƏRTAC
Reytinqlərin formalaşmasında tədqiqat fəaliyyəti əhəmiyyətli rol oynayır. Bu sahədəki problemlərdən biri elmi fəaliyyətlərin parçalanmış və konsolidasiyadan kənar olmasıdır. Tədqiqatların daha sistemli və qruplaşdırılmış şəkildə həyata keçirilməsi universitetlərin reytinqlərini yüksəldə bilər.
AZƏRTAC xəbər verir ki, bunu elm və təhsil naziri Emin Əmrullayev Elm və Ali Təhsilin Beynəlmiləlləşməsi Forumunda deyib.
O bildirib ki, xarici tələbələrin və müəllimlərin sayı, həmçinin müəllim-tələbə nisbəti universitetin beynəlxalq səviyyəsini göstərən əsas göstəricilərdir: “Reytinqlər bəzən tənqid olunsa da, onlar idarəetmə qərarları üçün istifadə olunan mühüm indikatorlar təqdim edir. Bu göstəricilərə əsasən, universitetlər öz fəaliyyət istiqamətlərini təkmilləşdirə bilərlər.
Azərbaycan universitetlərində tədqiqatların fraqmentasiya olunmuş vəziyyətdə olması əsas problemlərdən biridir. Tədqiqatlar çoxsaylı kiçik qruplar arasında paylanıb, birgə fəaliyyət az müşahidə edilir. Alimlərin fərdi fəaliyyətləri çox vaxt ümumi universitet göstəricilərinə təsir etmir”.
Nazirin fikrincə, problemin həll yolları tədqiqatların vahid institutlar və ya konsorsiumlar çərçivəsində birləşdirilməsi, elmi fəaliyyətlərin universitet səviyyəsində daha yaxşı koordinasiya olunmasıdır.
