Dekabrın 11-də Bakı Apellyasiya Məhkəməsində hüquq müdafiəçisi Rüfət Səfərovun həbsindən verilən şikayətə baxılıb.
Vəkil Bəhruz Bayramovun Turan-a verdiyi məlumata görə, müdafiə tərəfi fəalın cinayət təqibi üçün əsas olmadığına görə həbsin ləğvini istəyib. Bu mümkün olmasa, vəkillər həbs qətimkan tədbirinin ev dustaqlığı ilə dəyişdirilməsini istəyiblər.
Vəkil qeyd edib ki, Səfərov dekabrın 3-də saat 17.06-da onunla telefonla danışarkən saxlanılıb. Söhbət zərərçəkmiş şəxsin Səfərova hücum etməsi səbəbindən kəsilib.
Vəkil qeyd edib ki, Rüfət Səfərov dərhal saxlanılıb, polislər onu dərhal araşdırmadan yan keçərək istintaq orqanına aparıblar və iki saat ərzində Səfərov barəsində cinayət işi açılıb. Bütün bunlar Səfərovun həbsinin planlı olduğunu təsdiqləyir.
Digər vəkil Röşanə Rəhimova isə bildirib ki, Səfərov ittihamları rədd edir, onu siyasi motivli hesab edir və cinayət işini ictimai fəaliyyəti ilə əlaqələndirir.
Səfərov qiyabi olaraq ABŞ Dövlət Departamentinin mükafatı ilə təltif edilməsi barədə vəkillərdən məlumat alıb.
Lakin Apellyasiya Məhkəməsi şikayəti təmin etməyib.
Səfərov dekabrın 3-də saxlanılıb. O, Cinayət Məcəlləsinin üç maddəsi - 178.3.2 (külli miqdarda ziyan vurmaqla törədildikdə dələduzluq), 221.1 (xuliqanlıq) və 127.2.3-cü maddələri ilə ittiham olunub. (Ümumi təhlükəli üsulla və ya xuliqanlıq məqsədilə qəsdən sağlamlığa az ağır zərər vurma).
Səfərov ittihamları rədd edərək, insan haqları fəaliyyətinə və ABŞ Dövlət Departamentinin mükafatına layiq görüldüyünə görə təqib edildiyini açıqlayıb.
