Seminarda yerli idmançıların yetişdirilməsinin vacibliyini bildirdik. Belədə legioner cəlb etməyimizə ehtiyac qalmaz.
İdman.biz xəbər verir ki, bunu “Report”a açıqlamasında Azərbaycan Güləş Federasiyasının (AGF) Hakimlər Kollegiyasının sədri Qərib Əliyev regionlarda keçirilən Ümumrespublika seminarlarının yekunları barədə danışarkən deyib.
O, seminarların formatı və məqsədi barədə danışıb: “Builki seminarları Naxçıvan da daxil olmaqla 13 regionda keçirdik. Tədbirlərdə əsasən yunan-Roma və sərbəst güləş yığmalarının məşqçiləri iştirak etdilər. Məqsədimiz güləş qaydalarını məşqçilərə izah etmək idi. Baxmayaraq ki, onlar müəllimdirlər. Fəndlərin necə qiymətləndirilməli olduğunu, hansı vəziyyətdə idmançılara xal verilib-verilmədiyini bilməlidirlər ki, sabah tələbələrinə də bunları öyrətsinlər. Yaxud çətin vəziyyətdə qalanda etiraz etsinlər. Qaydaları onlara həm videogörüntülər şəklində, həm də şifahi formada izah etdik. Məşq proseslərinə, idmançıların çəkilərini salmasına və ya yüksəltməsinə dair tövsiyələrimiz oldu. İdmançıları qorumaq, yığma səviyyəsinə çatdırmaq lazımdır. Sonda da hər növ üzrə məşqçilər üçün nümunəvi məşqlər keçdik”.
Mütəxəssis regionlardakı idman zallarında çatışmazlıqlar olduğunu söyləyib: “Çatışmazlıqlara gəlincə, seminarları keçirdiyimiz idman zallarının, demək olar ki, hamısında istilik sistemi yox idi. Yalnız Tərtərdəki Olimpiya İdman Kompleksində şərait normal idi. Güləş Federasiyası bəzi zalları döşəklərlə təmin edib. Bəzilərində köhnə də olsa, döşəklər var. İdman məktəblərinin əməkdaşlarına yeni döşəklər almalarını tövsiyə etdik. Seminarda yerli idmançıların yetişdirilməsinin vacibliyini bildirdik. Belədə legioner cəlb etməyimizə ehtiyac qalmaz”.
Q.Əliyev məşqçilərdə həvəs yaratmaq üçün Güləş Federasiyası tərəfindən müəyyən addımlar atıldığını bildirib: “Əvvəlki kimi olmasa da, rayonlarda güləşə maraq var. Bunun da səbəbləri məlumdur. Xeyli sayda qeyri-olimpiya idman növləri var. Hansı ki, bəziləri güləşdə uğursuz olmasına baxmayaraq, bu növlərdə uğur qazanır, Avropa və dünya çempionu olur. Bu, uşaqları olimpiya idman növlərindən uzaqlaşdırır. Bununla belə, güləşə axın var. Elə zal olmadı ki, orada güləşçi görməyək. Məşqçilər gücləri çatdığı qədər işləyirlər. Həm də bəzən idmançılar öz çəkiləri üzrə sınaqçı-rəqiblər tapa bilmirlər. Məşqçilərdə də maraq yartmaq üçün Güləş Fedrasiyası tərəfindən müəyyən addımlar atılır və qərarlar qəbul edilir. Regional bazalar yardılmalıdır. Buna dövlət səviyyəsində dəstək göstərilməlidir. Artıq regionlarda gimnaziyalar var və uşaqları yerləşdiririk. Məşqçilərə başa salırıq ki, ora gedən tələbələr sona qədər sizinki sayılacaq”.
Qeyd edək ki, güləş məşqçilərinin Ümumrespublika seminarı bu il 13 mərhələdən ibarət olub. Ölkənin bütün regionlarını əhatə edən tədbir Naxçıvan, Şirvan, Quba, Sumqayıt, Mingəçevir, Qəbələ, Qobustan, Qazax, Gəncə, Tərtər, Lənkəran, Sabirabad və Bakıda keçirilib.
İdman.biz
