Bakı, TurkicWorld
İHA-230, Roketsan tərəfindən hazırlanmış, hava-yer tipli və sürətli ballistik raketdir.
İlk sınaq atışı 2022-ci ilin dekabrında AKINCI TİHA-dan həyata keçirilib. Çoxlüləli reaktiv yaylım atəş sistemləri və raket sahəsində böyük təcrübəyə sahib olan Roketsan, İHA-230-u TRG-230 Ballistik Raket əsasında inkişaf etdirib. Bu raket 150+ kilometrlik uçuş məsafəsi ilə diqqət çəkir.
İHA-230 raketinin ilk atış sınağı zamanı, 2022-ci ilin dekabrında Çorludan havaya qalxan AKINCI TİHA təxminən 700 kilometrlik bir uçuş edərək Sinopdakı sınaq meydançasına çatıb. 25.000 fut yüksəklikdən hədəfə atılan TRG-230-İHA raketi, 100 kilometrdən çox məsafədən hədəfini müvəffəqiyyətlə vurub.
Raketin effektiv uçuş məsafəsi buraxılış sürətindən və hündürlüyündən asılı olaraq 150 kilometrdir. Zərrəcik effektli döyüş başlığına sahib olan İHA-230-un, müxtəlif hədəf tiplərinə qarşı zirehli deşici və termobarik döyüş başlığı variantları da mövcuddur.
Dünya müharibəsi doktrinaları baxımından əhəmiyyətli olan İHA-230, PUA-dan buraxıldıqdan sonra bir müddət havada sərbəst düşür və sonra müstəqil olaraq bərk yanacaq mühərrikini işə salır. GNSS dəstəklənən ətalət yönləndirmə sistemi ilə hədəfə dəqiq yönləndirilən raket, "yandır və unut" funksiyasına malikdir. Bu xüsusiyyət, istifadəçiyə düşmən mövqelərinə dərindən girmədən kritik missiyalarda raketi istifadə etmək imkanı tanıyır. Klassik hava hücumundan müdafiə tədbirləri ilə isə raketi məhv etmək çox çətindir.
