13 dekabr 2024-cü il tarixində Sərhədçi İdman Olimpiya Mərkəzində Boccia idman növü üzrə “2024 Seni Cup” Azərbaycan Çempionatı keçirilib.
“Qafqazinfo” xəbər verir ki, tədbir Azərbaycanın paraolimpiya idmanının inkişafına mühüm töhfə olmaqla yanaşı, inklüziv cəmiyyət quruculuğunda idmanın əhəmiyyətini bir daha nümayiş etdirib.
Çempionat Azərbaycanın Əmək və Əhalinin Sosial Müdafiəsi Nazirliyi, Sosial Xidmətlər Agentliyi, Gənclər və İdman Nazirliyi, Azərbaycanın Milli Paralimpiya Komitəsi və Azərbaycan Boccia İdman Federasiyasının dəstəyi ilə təşkil olunub. Tədbirin əsas sponsorlarından biri isə “Seni” brendi olub. “2024 Seni Cup” bu sahədə növbəti uğurlu addım olmaqla yanaşı, Azərbaycanın paralimpiya idmançılarının gələcək nailiyyətlərinə zəmin yaradıb.
Tədbirdə iştirak edən Suraxanı Rayon İcra Hakimiyyətinin başçısı Adil Əliyev idmançıların hamısı ilə təkbətək görüşərək, onları təbrik edib: “Zəif kateqoriyadan hesab olunan bu insanların diqqət və qayğıya çox ehtiyacları var. Ümumiyyətlə, tədbir bizi çox duyğulandırdı. Bütün təşkilatçılara təşəkkür edirik.
Mükafatlandırma tədbiri yalnız idman nailiyyətlərini deyil, həm də sosial inteqrasiyanın və dəstəyin önəmini vurğulayan bir platforma olub. Bu, həm də onlara cəmiyyətə inteqrasiya etmək imkanı yaradır.
Məhdud hərəkət imkanlarına malik şəxslər Boccia idman növündə, həmçinin incəsənət nümunələrini nümayiş etdirməklə öz potensiallarını göstəriblər və bu, izləyiciləri həm təsirləndirib, həm də qürurlandırıb. Böyük zəhmət və iradələri ilə qalibiyyətə çatan bu idmançılarla fəxr edirik”.
BOCCİA idman növü üzrə “SENİ CUP” Azərbaycan çempionatında göstərdiyi təşkilati dəstəyə görə tanınmış dermatokosmetoloq Rəna Soltanova rəhbəri olduğu Estetik Kosmetologiya Mütəxəssiləri İctimai Birliyinə verilən təşəkkürnamə EKMİB-in İdarə Heyəti sədrinin müavini Yeganə xanıma təqdim edilib.
