Azərbaycan Silahlı Qüvvələrinin baş leytenantı olan Vüsal Kazımov 1990-cı il dekabrın 17-si Lənkəran rayonunun Yuxarı Nüvədi kəndində anadan olub.
QHT.az xəbər verir ki, o, 2011-ci ildə hərbi xidmətə yollanıb və Təlim və Tədris Mərkəzində “Ehtiyat zabit hazırlığı kursu”nu müvəffəqiyyətlə bitirdikdən sonra ön xətdə yerləşən "N" hərbi hissədə taqım komandiri kimi Vətənin keşiyində durub. Vüsal Kazımov 44 günlük Vətən müharibəsi zamanı Füzuli-Xocavənd istiqamətində gedən döyüşlərdə iştirak edib. Sonuncu dəfə 26 oktyabrda ailəsi ilə əlaqə saxlayan Vüsal Kazımov Şuşa döyüşləri zamanı qəhrəmancasına şəhid olub və 29 noyabr tarixində Lənkəran rayon Yuxarı Nüvədi kəndində böyük izdihamla dəfn edilib.
Vüsal Kazımov göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda", "İgidliyə görə", "Xocavəndin azad olunmasına görə", "Füzulinin azad olunmasına görə" medalları və 3-cü dərəcəli "Vətənə xidmətə görə" ordeni ilə təltif edilib.
Ruhu şad olsun!
