Rusiya ilə Suriyanın yeni hakimiyyət orqanları arasında Tartus və Latakiyadakı hərbi bazaların saxlanılması ilə bağlı danışıqlar müsbət şəkildə gedir...
Poliqon xəbər verir ki, bu barədə The National nəşri Suriyanın əksər hissəsinə nəzarət edən "Həyat Təhrir əş-Şam" qruplaşmasının mənbəsinə istinadən yazıb.
Nəşrin həmsöhbəti qeyd edib ki, məsləhətləşmələr hələ ilkin mərhələdədir. Bundan əlavə, o, yeni hakimiyyət orqanlarının Bəşər Əsədin prezidentliyi dövründə Moskva ilə bağlanmış Tartus limanının icarə müqaviləsinə əməl etmək niyyətində olduğunu bildirib. Qrupdakı mənbə vurğulayıb ki, sazişə birtərəfli yenidən baxılması qeyri-mümkündür və istənilən yeni rejim onu həyata keçirməyə borcludur.
Jurnalistlərinin Xmeymim aviabazasına səfərindən sonra sözlərini The National nəşri sitat gətirən Rusiya silahlı qüvvələrinin nümayəndəsi də Suriyanın yeni hakimiyyət orqanları ilə ümumilikdə konstruktiv münasibətləri qeyd edib: "Bizim yeni hökumət başçısı ilə əlaqəmiz və ünsiyyətimiz var və heç bir tərəf digərini təxribat etmir".
Rusiya hərbçiləri Suriyada Xmeymim aviabazasında və Tartusdakı logistika məntəqəsində mövcuddur. İkitərəfli razılaşmaya əsasən, Moskva bu bazalardan 2066-cı ilə qədər istifadə edə bilər.
Dekabrın 12-də Rusiya "Həyat Təhrir əş-Şam" qruplaşmasının siyasi komitəsi ilə əlaqə yaradıb. Daha sonra Rusiya Federasiyası xarici işlər nazirinin müavini Mixail Boqdanov bildirib ki, Rusiya tərəfi Suriyadakı hərbi bazalarını saxlamağa ümid edir. Bir gün əvvəl, dekabrın 16-da HTS qrupunun Siyasi Büro üzvü Kamal Lababidi bildirib ki, Rusiya ən azı 400 hərbçini Dəməşq ərazisindən çıxararaq Xmeymim aviabazasına köçürüb.
Poliqon.info
