Azərbaycan Bodibildinq və Fitnes Federasiyası bu il idmançılarımızın beynəlxalq arenada çıxışlarının ümumi nəticələrini açıqlayıb.
İdman.biz xəbər verir ki, komanda mövsüm ərzində iki rəsmi yarışda iştirak edərək 30 mükafat qazanıb.
Santa Susannada (İspaniya) keçirilən Avropa çempionatında idmançılar ümumilikdə səkkiz qızıl, altı gümüş, altı bürünc medal və dörd mütləq titul qazanıblar. Bundan əlavə, yığmamız ümumi komanda hesabında birinci olub.
Özü də mütləq titul qazanan dörd idmançının hər biri beynəlxalq yarışların debütantı olub. Bunlar Pərviz Qasımov (bodibildinq), Rauf Əliyev ("Muscular Men's Physique"), Fariz Nəcəfli ("Men's Physique") və yeniyetmələrdə Aşur Abdullayevdir ("Men's Physique").
Komanda Santa Susannada keçirilən Dünya kubokunda da fərqlənib. Orada dörd qızıl, iki gümüş və dörd bürünc, həmçinin Elnur Allahyarlı (bodibildinq) və Fariz Nəcəflinin ("Men’s physique") sayəsində iki mütləq titul qazanılıb.
Samir Məmmədli (bodibildinq) və yeniyetmələrin yarışında ("Men’s physique") qalib olmuş Aşur Abdullayev də İspaniyada qələbə qazanıblar.
Beləliklə, il ərzində Azərbaycan bodibilderləri 12 qızıl, 8 gümüş və 10 bürünc medal və altı mütləq titul qazanıblar.
Zəki Feyzullayev
İdman.biz
